Java e katërt e Abissnet Superiore o të luhet të ndara të tre ditë. Ajo nis sot me duelin Teuta-Kukësi, që zhvillohet në stadiumin “Niko Dovana”, duke filluar nga ora 17:45. Vijon nesër më dy ndeshjet e tjera Kastrioti-Tirana që zhvillohet në stadiumin e Kamzës dhe Egnatia-Vllaznia, sfida këto, të cilat që të dyja nisin në orën 15:00.
Java e katërt mbyllet me dy ndeshjet e datës 11 shtator e më konkretisht Laçi-Bylis, që nis në ora 15:00 në stadiumin e Laçit dhe Partizani-Erzeni që nis në ora 17:45 në stadiumin “Elbasan Arena”.
Sa i takon ballafaqimit të sotëm që luhet në “Niko Dovana”, e veçanta është se edhe pse kemi të bëjmë me dy skuadra të investuara për trofe, ato mbyllin tabelën e klasifikimit. Durrsakët me vend të parafundit me dy pikë dhe Kukësi i fundit me vetëm 1 pikë.
Është kjo arsyeja që në të dy kampet përkatëse, drejtuesit e tyre kërkojnë patjetër fitoren tre pikëshe. Madje, Teuta pikërisht për këtë fakt ka zëvendësuar trajneri, ku në vend të Renato Arapit të larguar është emëruar korçari Blendi Shkëmbi.
Mungesa e rezultateve ka vënë në rrezik edhe trajnerin e Kukësit, Skënder Gega, i cili mësohet të jetë paralajmëruar nga presidentit Safet Gjici, që në rast mungesës së një rezultati pozitiv në këtë ndeshje do të ketë ndërhyrje në staf.
Burime pranë FSHF-së, bëjnë të ditur se drejtësinë në këtë ndeshje do ta vendosë gjyqtari nga Patosi, Olsid Ferataj, i cili do të ketë ndihmës Rejdi Avdi dhe Astrit Mahmuti nga Tirana dhe Elbasani. Ndërsa në sistemin VAR do të jenë Enea Jorgji dhe Emigres Ganxhi.
