Me ftesë të Prefektes së Shkodrës, Majlinda Angoni, ekipi i Vllaznisë në volejboll për femra ishte sot i pranishëm në institucionin e Prefekturës së Qarkut Shkodër. I shoqëruar nga Presidenti i Shoqatës së Volejbollit Vllaznia, Florian Zekja dhe stafi teknik Besnik Lisha, Dorian Tafa, Ferdinand Bardeli, Fatjet Haxhagiç, ekipi kuqeblu u prit nga Prefektja Majlinda Angoni.
Jo vetëm si numri një i këtij institucioni por edhe si një qytetare shkodrane, tifoze sporti, por edhe sipërmarrëse e suksesshme me bashkëshortin e saj, të mirënjohurin Edmond Angoni, prefektja Angoni gjatë fjalës së saj inkurajoi vajzat që të jenë sfiduese jo vetem në lojë por edhe në jetë.
Një gjë të tillë ajo e përforcoi edhe si drejtuese prej vitesh e një organizate që në fokus ka gratë dhe padyshim që gratë nuk i thonë jo asnjë sfide. Ndaj, në emrin e saj personal dhe të institucionit që ajo përfaqëson, ndërsa garatoi se do të jetë e pranishme në të gjitha ndeshjet e tyre, zonja Angoni premtoi dhe garantoi mbështetje të gjithëanshme për Shoqatën e Volejbollit Vllaznia për femra.
Në shenjë respekti dhe konsiderate për të, volejbollistet e Vllaznisë, mes të cilave gjendeshin edhe tre volejbollistet e huaja, bjelloruse dhe ruse, i dhuruan prefektes Angoni një bluzë sportive me siglën e shoqatës së tyre.
Në emër të skuadrës kuqeblu, në këtë takim folën presidenti i shoqatës, Florian Zekja dhe trajneri i skuadrës kuqeblu, Besnik Lisha, të cilët ndër të tjera, bazuar në një organizim disi ndryshe të këtij sezoni, deklaruan se objektivi i Vllaznisë është fitimi i titullit kampion për sezonin 2022-2023.
(Video) Takimi i Prefektes Majlinda Angoni me ekipin e volejbollit femra Vllaznia-Prononcimet e Prefektes Majlinda Angoni, Presidentit Florian Zekja dhe trajnerit Besnik Lisha)
