Blerja më e re e Vllaznisë, senegalezi Matar Dieye, i cili ka ardhur për llogari të repartit të sulmit kuqeblu, është pritur që të do të ishte në stërvitje me skuadrën që në seancën e djeshme stërvitore, por për arsye të testeve mjekësore, pranë Klubit të Futbollit Vllaznia si dhe në klinikat e specializuara të qytetit të Shkodrës, prania e tij në stërvitje me skuadrën kuqeblu është spostuar për seancën e pasdites së mërkurë.
Seancë të cilën, stafi teknik ka planifikuar të zhvilluar një ndeshje miqësore si ajo e para një jave, në mes ekipit të dytë, Vllaznisë B dhe ekipit Vllaznia U21. Një miqësore, e cila krahas të tjerave, vemendja kryesore do të jetë tek sulmuesi senegalez, i cili është planifikuar të jetë në fushë përgjatë 90-të minutave për të parë realisht, sesa është i gatshëm të jetë në shërbim të skuadrës për ndeshjen së hënës ndaj Partizanit.
Në të njëjtën kohë, stafi teknik ka mundësinë të ndjekë nga afër edhe futbollistin kosovar Arton Podrimcaku, i cili prej disa ditësh është në provë tek Vllaznia për llogari të krahut të majtë të prapavijës, ku me dëmtimet e fundit në këtë repart, tekniku Brdariç ka problem për fiksimin e një titullari në këtë rol.
