Fundjava ka rezervuar dy ndeshje interesante për ekipet e Vllaznisë në basketboll për femra dhe meshkuj, sfida të cilat do të luhen sot në pallatin e sportit “Qazim Dervishi” të Shkodrës. Dy ekipet kuqeblu do të përballen respektivisht me Flamurtarin për femra dhe Teutën për meshkuj, ndeshje këto të vlefshme për javën e 11-të të Kampionatit Kombëtar.
Të parat që do të zbresin në fushën e lojës do të jenë femrat, ku përballë Vllaznisë së drejtuar nga trajnerja Medina Mustafa është skuadra kampione Flamurtari, ndeshje kjo e cila nis prej orës 15:00.
Ndërkohë, ballafaqimi i meshkujve, Vllaznia-Teuta, e vlefshme për kategorinë e Superligës, është planifikuar të luhet në orën 18:00. Dy skuadra këto që renditen në vendin e dytë dhe të tretë dhe që sa herë janë ndeshur njëra me tjetrën kanë dhuruar spektakël.
E tillë pritet të jetë edhe kjo supersfidë e sotme, për të cilën Vllaznia e drejtuar nga trajneri Eni Llazani është e karikuar të dalë fituese për të vijuar kështu ecurinë pozitive që ko skuadër pati në javët e fundit të vitit 2024.
Për ta kaluar me sukses këtë duel të vështirë, drejtuesit e ekipit Vllaznia për meshkuj, kërkojnë mbështetjen e tifozërisë së zjarrtë shkodrane.
“Dita e Ndeshjes : VLLAZNIA vs TEUTA!
Sot, në orën 18:00, të gjithë në Pallatin e Sportit “Qazim Dervishi” për një përballje të rëndësishme mes Vllaznisë dhe Teutës! Një sfidë mes ekipeve të vendit të dytë dhe të tretë, që premton emocione dhe rivalitet të madh.
Ekipi ynë ka nevojë për mbështetjen tuaj për ta kthyer këtë ndeshje në një fitore të madhe! Të gjithë së bashku për të treguar forcën e vërtetë të Vllaznise!
Sot, 11 janar, Ora 18:00. Pallati i Sportit “Qazim Dervishi”. Mos mungoni! Forca Vllaznia! ”
