Partizani arriti të marrë një pikë të vlefshme ndaj Vllaznisë kryesuese të kampionatit, në ndeshjen e zhvilluar në stadiumin “Arena e Demave”, e cila përfundoi me rezultatin 1-1. Takimi u karakterizua nga ritëm i lartë, duele të forta dhe raste të shumta për shënim nga të dyja skuadrat.
Të kuqtë nisën më mirë lojën dhe arritën të zhbllokonin rezultatin në pjesën e parë me anë të Rrok Tomës, i cili shfrytëzoi një kombinim të shpejtë në zonë dhe mposhti portierin shkodran me një goditje të saktë. Ky gol i dha moral Partizanit, që vazhdoi të kërkonte avantazhin e dyfishtë, por pa arritur të konkretizonte.
Në pjesën e dytë, Vllaznia u rikthye më agresive dhe e rriti presionin në gjysmëfushën e kundërshtarit. Përpjekjet e skuadrës së drejtuar nga zv.trajneri Ergi Borshi në mungesë të Edi Martinit dënuar nga Diplina me dy ndeshje, u shpërblyen kur Esat Mala, ish-lojtar i Partizanit gjeti rrugën e rrjetës, duke barazuar shifrat pas një aksioni të mirëorganizuar. Goli i Malës ndryshoi ritmin e lojës, me të dyja ekipet që u hodhën në kërkim të fitores, por pa mundur të gjejnë golin vendimtar.
Barazimi lë Vllazninë në krye të renditjes, duke ruajtur diferencën me ndjekësit, ndërsa Partizani mbetet në vendin e shtatë, por fiton një pikë të rëndësishme në garën për t’u ngjitur në zonën e sipërme të tabelës.
Takimi i zhvilluar prej orës 16:30 të së dielës në “Arenën e Demave” konfirmoi edhe një herë rivalitetin e fortë mes dy skuadrave historike të futbollit shqiptar, duke ofruar një ndeshje me ritëm të lartë dhe emocione deri në minutat e fundit.
