Skënderbeu dhe Laçi do të përballen të hënën, për të luajtur ndeshjen e vlefshme të javës së 24-të të Superiores. Sfida që do të zhvillohet në stadiumi “Skënderbeu” të Korçës,nis në orën 17:00.
Një ndeshje mjaftë interesante, pasi vendasit do të kërkojnë një fitore që u duhet për të nisur daljen nga balta, pasi renditen të fundit. Në krahun tjetër Laçi i vendit të 6-të, por vetëm 1 pikë larg nga zona e ftohtë, do të kërkojë maksimumin në këtë sfidë.
Megjithatë, stadiumi “Skënderbeu” është një makth për Laçin. Kurbinasit në Korçë kanë statistika shumë negative, me 6 fitore, 6 barazime dhe plot 20 humbje, duke bërë që favorit në këtë sfidë të shihet Skënderbeu.
Skuadra korçare ka hyrë në rrugën e rezultateve pozitive, e cila është evidente në këto javët e fundit, kur ka mar katër pikë në kampionat dhe ka mundur Dinamon në Kupë.
Në lidhje me këtë fakt, kapiteni i bardhekuqve, Elvis Prençi deklaron: “Vërtet po kalojmë një moment shumë pozitiv, por nuk kemi bërë ndonjë gjë të madhe. Duhet të jemi me këmbë në tokë dhe të përulur, pasi lufta sa vjen dhe bëhet më e ashpër.”
Ndërkohë, Prençi ka dhe një opinion mbi futbollistët e afruar nga merkato, të cilët jan shfaqur shumë të dobishëm dhe kjo është një gjë shumë pozitive për të: “Na kanë ndihmuar dhe do të na ndihmojnë shumë,pasi duket që kan eksperiencë dhe njohin vlerat dhe cilësitë.”
Tashmë dihet se Rashica dhe Rabiu do të largohen. Prençi ka një koment edhe për këtë fakt: “Jan lojtarë shumë të mirë,me një kontribut dyvjeçar në këtë ekip. Ky është futbolli dhe ndodhemi në këtë situatë,por unë u uroj që të kenë sukses ngado që të luajnë. Ne kemi në ekip lojtarë që do të bëjnë mirë dhe do të japin më të mirën për ekipin.”
Fatos LAMAJ