Përballja në mes Adës së Velipojës dhe Shënkollit të qarkut Lezhë, e vlefshme për javën e tretë të Kampionatit Kombëtar të futbollit për kategorinë e dytë, grupi A është shoqëquar me një luftë të fortë sportive. Takimi i luajtur pasditen e sotme në stadiumin “Adriatik” të Velipojës ka pasur vetëm një protagonist, skuadrën vendase, e cila që në start të ndeshjes dhe deri në minutën e 89-të pati epërsi të padikutueshme në fushën e lojës, por pa arritur të konkretizoi asnjë prej rasteve të krijuara me gol në portën kundërshtare.
Mos gjetjen e rrugës së rrjetës nga ana e tyre, krahas të tjerave, Ada e kërkoi edhe tek arbitri i ndeshjes, që sipas drejtuesve velipojakë nuk ishte korrekt me vendimet e dhëna duke favorizuar dukshëm ekipin kundërshtar.
Atë që nuk e bënë vendasit me sa e sa raste të krijuara në portën mike, arriti ta bëjë skuadra mysafire. Është minuta e 90-të, atëherë kur e gjithë skuadra velipojake është e zhvendosur në gjysëm fushën e Shënkollit duke ngulmuar në gjetjen e golit të avantazhit, një kundrasulm i shpejtë miqve ndëshkon Adën me një gol të shënuar nga Sebastjan Deda.
4 minuta shtesë të akorduara nga gjyqtari i katërt, shkodrani Dragusha nuk vlejnë, pasi Shënkolli i rreshtuar i tëri në prapavijë arrin ta ruajë në fuqi avantazhin e rezultatit 0-1. Fitore shumë e rëndësishme e Shënkollit që pas 3 ndeshjeve shkon në kuotën e 7 pikëve, ndërkohë që Ada, me dy humbje, që të dyja në shtëpi, me Elbasanin dhe sot me Shënkollin dhe një fitore në transfertë me Murlanin ka tre pikë në tre ndeshje.
