Egnatia dhe Vllaznia u ndalën në barazim me shifrat 2-2 në ndeshjen e vlefshme për javën e 31-të të Superiores. Trajneri i Vllaznisë, Thomas Brdaric u shpreh në përfundim të ndeshjes.
“Pikë së pari jam krenar për ekipin tonë, që morëm minimalisht një pikë këtu. Në pjesën e parë, si e nisëm, ishim shumë të avashtë. Nuk kishim mundësi të ishim të rrezikshëm. Pastaj humbëm një top shumë të thjeshtë në qendër dhe e ftuam Egnatian të shënonte. Ishim në disavantazh dhe të kthesh në këtë stadium, në një atmosferë të nxehtë dhe si e kthyem, tregon që kemi mentalitet të mirë dhe cilësi që të përballojmë ekipe të mira si Egnatia, Dinamo apo ekipe të tjera. Nuk kam asnjë frikë për këtë. Në pjesën e dytë investuam më shumë dhe kishim më shumë mundësi që të fitonim ndeshjen.
Të luash një qarkullim të mirë të topit, nuk pritnim të ishte ashtu fusha, shumë e rrëshqitshme, ishim gjithë kohës me rrëshqitje dhe nuk ishim të sigurt me topin, por ideja ishte të mbanim më shumë topin apo krijonim më shumë në qendër, e në pjesën e dytë të bënim ndërrim nëse rivalët do të ishin të lodhur dhe me anësoret t’i kapnim në kundërsulm. Por sigurisht, pas ndeshjes je më i zgjuar gjithmonë.
Fillimisht duhet 100% besim, që të kemi mundësi që të fitojmë dhe të ulim numrin e gabimeve, se shumë shpesh i ftojmë kundërshtarët me topa të falur dhe i lejojmë të vijnë në kundërsulm, Duhet të reduktojmë këto gabime. Por në fund arritëm të tregonim një fytyrë të mirë se shoh një Vllazni të fortë dhe të luash këtu, nuk është e lehtë. Duhet që fati të kalojë në krahun tonë, se në Superiore çdo ndeshje është e afërt, e ngushtë, edhe fitimi i dueleve është i rëndësishëm. Në përgjithësi jam OK me rezultatin.
Balaj? Është një hap mbrapa për ne, një gjë e vështirë që ta ndërronim direkt. Ai ka një dëmtim në aduktorë, shpresojmë të mos jetë gjë e madhe, se na duhet, është një lider si lojtar. Sipas meje, edhe Mensah bëri një punë të mirë, po punon shumë dhe arriti të zëvendësojë Bekimin sot”, tha Brdariç për RTSH pas ndeshjes.