Tre fitoret radhazi dhe rikthimi për të luajtur me spektator ishte një motiv më tepër për Kukësin që të vijonte serinë e tre fitoreve radhazi në kampionat. Por, përballja e sotme me Egnatian në shtëpi ka qënë e pafat për verilindorët. Rrogozhinasit kanë surprizuar me lojë, por në fund edhe me rezultat duke fituar me rezultatin 0-1, një dhuratë e bukur kjo për Duros n ndeshjen e parë debutuese në pankinën rrgozhinase.
Kuksianët i dënon një autogol i Fereiras, portugezit që është lideri i mbrojtjes që nuk pësonte gol prej 270 minuta lojë. Egnatia rikthehet te suksesi me Duron që nuk vonoi të japë impaktin e tij në pankinën rrogozhinase, duke kaluar në renditje pikërisht verilindorët.
Në një ndeshje të bllokuar, ku Egnatia u mundua të mbyllë të gjitha hapësirat, Kukësi kishte mundësitë e tij për shënim, duke kërcënuar Sherrin me Shqipërim Taipin që në minutën e 5-të. Goditja e dënimit e pasaktë e mesfushorit i la vendin protagonizmit të Gabriel Barbosa. Braziliani u mundua të prishte ekuilibrat dy herë në tre minuta: fillimisht në minutën e 32-të me një goditje me kokë e pastaj në të 35-ën duke shfrytëzuar keq një assist të Haxhiut.
Qendërsulmuesi e mbylli pjesën e parë me një tjetër tentativë me kokë, që në të 44′, gjeti devijimin vendimtar të Malotës. Asnjë ndryshim sjellje e rrogozhinasve, që presin kundërsulmin e duhur, duke nuhatur tendencën e Kukësit për tu shtyrë përpara. Delarzh shpenzoi një mundësi ideale menjëherë pas rifillimit, por ishte sinjali se Egnatia ishte aty. 4-4-2 i Dobit që humbi Berishën që në pjesën e parë, u shndërruar me dy qendra pas aktivizimit të Dacit për Basa, edhe pse njeriu më i rrezikshëm mbeti Barbosa, që në të 52′ ishte i pafat.
Konkluzioni i brazilianit, me Sherrin të mundur, u ndal nga shtylla, ndërsa portieri vazhdoi të kishte përqendrimin edhe në goditjen me kokë në të 57’ e dhjetë minuta më pas kur shoqëroi me sy të djathtën e Barbosas që përfundoi mbi kuadrat. Braziliani i provoi të gjitha, edhe akrobacinë, por porta e Sherrit mbeti e paprekur, ndërsa dëshira për ta fituar ndeshjen i bëri kuksianët të zgjateshin më shumë se duhej, duke i dhënë hapësirën që nuk duhej Delarzh.
Sulmuesi e shpenzoi mundësinë e paraqitur në të 77’, por pati ndihmën e Fereiras 5 minuta më vonë, në episodin që vendosi ndeshjen. Një devijim fatal, për lumturinë e Duros: tri pikë në debutim, e parakalim i Dobit në vendin e katërt me 12 pikë. Për Blutë një pikë më pak, e disfata e parë pas 5 takimesh radhazi pa pësuar mes kampionatit e kupës.
