Korçarët japin shenja mbijetese. Skëndërbeu i fundit në tabelën e klasifikimit me vetëm 3 pikë ka ndalur Kukësin e vendit të dytë duke e stopuar në kuotën e 14 pikëve, ndërkohë që vetë korçarët me fitoren e mbrëmjes së sotme 2 me 1 ndaj verilindorëve ngjiten në kuotën në kuotën e 6 pikëve. Kukësi merr kështu një ndëshkim rëndë duke ndalur hapin pas dy fitoreve rresht, ndërkohë që Skënderbeu zhvilloi një ndeshje model dhe shënoi dy gola për të rrëmbyer tri pikë të merituara. Skuadra korçare e drejtuar nga tekniku Migen Memelli e nisi ndeshjen menjëherë me ritmin e duhur duke iu kundërpërgjigjur Kukësit me një shkëndijë të Mensah por pjesa e parë dhuroi shumë pak emocione në të dyja kampet ku korçarët tentuan të kontrollonin fijet e mesfushës dhe ia dolën mbanë duke izoluar lojtarët më të rrezikshëm të verilindorëve.
Pjesa e dytë nisi menjëherë me një gol të shpejtë të shënuar nga Dumfur, i cili shfrytëzoi topin e harkuar në zonë pas një goditje dënimi. 1-0, festë në stadiumin Skëndebeu por vendasit nuk u tërhoqën madje morën zemër duke e çuar përpara topin drejt gjysmëfushës së Kukësit, dukshëm në vështirësi. Një ndeshje që u karakterizua nga nervozizmi i tifozëve dukshëm të irrituar me gjyqtarin por as kjo ndalesë nuk ia uli ritmin skuadrës së Memellit që gjeti edhe rrjetën e dytë pas një kundërsulmi të shpejtë të finalizuar nga Mensah, një nga më aktivët në fushën e lojës. Gol tërësisht i merituar për sulmuesin bardhekuq.
Kukësianët kërkojnë të reagojni, por e kanë të vështirë përballë një Skënderbeu shumë të mobilizuar në fushën e lojës. Megjithatë, në limit të krejt ndeshjes, në minutën e fundit shtesë, Kukësi arrin të shkurtojë diferencën me një gol të shënuar nga pika e penalltisë nga Hila. Gol, i cili vlen vetem për statistikë, sepse nuk ka kohë. Vërshëllima përfundimtare e arbitrit kryesor fikson shifrat 2 me 1 për Skënderbeun e Korçës.
