Shqipëri-Poloni 1-2(Shënuese: Qëndresa Krasniqi 10’/Ewa Pajor 24’, 30’)
Shqipëria: Rexhepi, Gjini, Maliqi, Tukaj, Curraj, Hamidi, Krasniqi, Franaj, Berisha, Maksuti, Doçi
Trajner: Armir Grima
Poloni: Szymanska, Matysik, Mesjasz, Dudek, Ëiankoëski, Lefeld, Paëollek, Graboësak, Bidas, Pajor, Zaëistoëska. Trajner: Patalon Nina
Kombëtarja shqiptare e femrave nuk ia doli të marrë një rezultat pozitiv mbrëmjen e sotme në “Elbasan Arena” ndaj Polonisë, sfidë e vlefshme për kualifikueset e Kampionatit Botëror “Australi -Zelandë e Re 2023”. Vajzat kuqezi u mundën me rezultatin e ngushtë 2-1, në një sfidë që duhet konsideruar si mjaft pozitive.
Skuadra e drejtuar nga Armir Grima e nisi takimin me këtë formacion: Rexhepi, Gjini, Maliqi, Tukaj, Curraj, Hamidi, Krasniqi, Franaj, Berisha, Maksuti, Doçi.
Përballja nisi shumë mirë për Shqipërinë e Grimës, që kaloi e para në avantazh që në minutën e 10-të të takimit me Qëndresa Krasniqin, e cila kalon një mbrojtëse kundërshtare nga e majta dhe e dërgon topin drejt e në rrjetë.
Pavarësisht kontollit të topit, polaket arrijnë të barazojnë rezultatin në minutën e 24-t, me Ewa Pajor. Pak minuta më vonë, polaket na ndëshkojnë sërish dhe shënojnë edhe golin e epërsisë sërish me Pajor.
Pjesa e parë u mbyll me avantazhin e polakeve, teksa ky rezultat nuk ndryshon as në pjesën e dytë të takimit. Të dyja skuadrat zhvillojnë një lojë të barabartë, teksa Kombëtarja shqiptare krijon edhe raste.
Momenti më i rrezikshëm për vajzat kuqezi ishte në minutën e 82-të, kur fitojnë një goditje dënimi që ekzekutohet me Megi Doçin, e cila i shkon shumë pranë golit duke goditur shtyllën, por ishte pa fat.
Në minutën e 83-të, Grima vendos të hedhë në fushë Endrina Elezaj në vend të Gresa Berishës, por asgjë nuk ndryshon, me Shqipërinë që mundet me rezultatin 2-1 nga Polonia e vendit të dytë në grupin F.
Ndeshja e fundit kualifikuese për Shqipërinë për Botërorin “Australi&Zelandë e Re 2023” do të jetë më 6 shtator ndaj Norvegjisë në transfertë.
