Kampionati i futbollit të femrave ka hyrë tashmë në zonën e nxehtë, ku edhe pak javë kanë mbetur për të përcaktuar kampionen e këtij sezoni. Java e 14-të do të luhet këtë fundjavë, ku sipas kalendatit, kampionia Vllaznia ka pushim, ndërkohë që në nënkampionai Apolonia është mysafire në Barbullush të Shkodrës për t’u ndeshur me Murlanin vendas të drejtuar nga trajneri Arben Parmeza. Ndeshja në fjalë do të zhvillohet të dielen duke filluar nga ora 13:00.
Murlani-Apolonia do të jetë ndeshja e fundit që mbyllë javën e 14-të, ndërkohë që të gjithë ndeshjet e tjera do të luhet të shtunën, ku ajo hapëse jave do të jetë Tirana AS – Atletik Club. Shkodranet e Atletik Club vijnë më të favorizuara në këtë ndeshje, pavarësisht se është në transfertë, teksa kryeqytetaset kanë marrë 4 pikë përgjatë gjithë këtij sezoni. Sfida do të nisë në ora 11:00 dhe do të luhet në Kamëz.
Sakaq, në Korçë do të zhvillohet një tjetër ndeshje interesante, Skënderbeu – Kinostudio, me juglindoret që vijnë pas një disfate të thellë ndaj Apolonisë dhe do të tentojnë të tregojnë një tjetër fytyrë. Ndeshja nis në ora 12:00 në Korçë.
Ndërkaq, në Kamëz do të luhet një tjetër sfidë, Partizani – Lushnja, në ora 13:00. Myzeqaret do të përballen në këtë javë me një tjetër ekip kryeqytetas, teksa javën e kaluar u mundën me shifrat e thella 0-7 nga Tirana. Lushnja gjendet në vendin e fundit në kampionat, ndërsa Partizani do të kërkojë vetëm tre pikët për të forcuar pozitat e vendit të katërt.
Nga ana tjetër, Tirana pret në ora 12:00 në “Skënder Halili” skuadrën e Teutës. Duket një ndeshje e lehtë për vajzat bardheblu në letër, që kanë bërë mjaft mirë përgjatë këtij sezoni futbollistik, duke mos u lëkundur asnjëherë nga pozitat e “Top 3”. Teuta vjen pas një pushimi një javor, për shkak të kalendarit të paracaktuar.
Ndeshjet e javës së 14-të:
5 mars 2022 Tirana AS – Atletik Club, ora 11:00
5 mars 2022 KF Skënderbeu – Kinostudio, ora 12:00
5 mars 2022 Partizani – Lushnja, ora 13:00
5 mars 2022 Tirana – KF Teuta, ora 14:00
6 mars 2022 KF Murlani – Apolonia, ora 13:00
