Skënderbeu-Vllaznia 0-14
(Shënues: Doçi 6, Maliqi 3, Kodra dhe Lufo nga 2, Gjergji 1)
Edhe pse në një fushë të mbuluar me dëborë, që në një farë mënyre është edhe arma më e fortë e skuadrës korçare, Vllaznia nuk ka dashur t’ia dijë duke vijuar rrugën e fitoreve.
Ndeshja e luajtur mesditën e sotme në stadiumin “Skënderbeu” të Korçës, në mes Skënderbeut vendas dhe Vllaznisë mysafire ka përfunduar me rezultatin e thellë 0 me 14 në favor të Vllaznisë.
6 nga 14 golat e skuadrës kuqeblu të drejtuar nga trajneri Nikolin Leka janë shënuar nga Megi Doçi, e cila në këtë ndeshje ishte edhe kapitene e skuadrës. Golat e tjerë për Vllazninë kanë për autore Maliqin me 3 gola të shënuar, Kodrën dhe Lufon nga 2, si dhe Gjergjin 1.
Ndeshja e sotme ishte për llogari të Javës së 11-të të Kampionatit Kombëtar të futbollit për femra kategoria Superiore, e cila vinte menjëherë pas ndeshjeve gjysëmfinale të Kupës së Shqipërisë, gjatë të cilave Vllaznia dhe Tirana u kualifikuan në finale, sfidë e cila pritet të luhet në fund të sezonit.
Pas kësaj jave, Kampionati Kombëtar i femrave ndërpritet përsëri për arsye të grumbullimit të kombëtares, ku 23 futbolliste kuqezi, 12 prej të cilave të Vllaznisë do të sterviten në kampingun sportive të Ulqinit.