Ashtu si edhe në futbollin e madh, ku Superioren e kryeson Tirana, edhe në Kampionatin Kombëtar të Futsallës, që organizohet nga Federata Shqiptare e Futbollit, tabelën e klasifikimit e kryeson Tirana.
Në këtë kampionat marrin pjesë 4 ekipe, që përfaqësojnë 4 qytete të vendit: Tirana (Tirana Futsall), Durrësi (Diamant Futsall), Elbasani (Elbasani Futsall) e Vlora (Flamurtari Futsall).
Kampionati në fjalë luajti fundjavën e kaluar ndeshjet e javës së pestë, teksa ka mbetur vetëm një javë nga fundi i këtij edicioni të parë që nisi në muajin mars.
Tirana ka marrë fitoren e pestë radhazi në kampionat, duke mundur skuadrën tjetër pretendente, Diamantin me shifrat 11-3. Kjo fitore i jep mundësi bardhebluve të sigurojnë vendin e parë në grup.
Sakaq, Flamurtari mundi në shtëpi Elbasanin me rezultatin 1-5, me vlonjatët që kanë mbledhur 7 pikë në pesë javë, ndërsa Elbasani nuk ka marrë asnjë fitore.
Pas përfundimit të kësaj faze, skuadrat do t’i drejtohen fazës së play-off-it, për të përcaktuar fituesin e parë të këtij kampionati, që do të ketë mundësinë të përfaqësojë Shqipërinë në UEFA Champions League Futsal.
Java e gjashtë do të luhet këtë fundjavë me sfidat Tirana Futsal – Elbasani Futsal të shtunën dhe Flamurtari FC – Diamanti Futsal FC të dielën.
Renditja pas javës së pestë:
Tirana Futsal 15 pikë
Flamurtari Futsal 7 pikë
Diamant Futsal 7 pikë
Elbasani Futsal 0 pikë
