Në prononcimin e dhënë pas ndeshjes, teksa bënte analizën e skuadrës së tij në miqësoren ndaj Burrelit, trajneri Thomas Brdariç preku shumë gjëra duke u ndalur kryesisht tek lojtarët e rinjë, që sipas tij kanë dhënë sinjale pozitive, por problemet e shfaqura në mbrojtje i anashkaloi. Megjithatë, nëse ka diçka që nuk ka shkuar mirë, ai la të kuptohej se lidhet me lodhjen që mund të kenë pasur futbollistët pas ngarkesave të marra gjatë javës, madje edhe paraditen e sotme.
“Për mua ishte e rëndësishme që të luajmë thjeshtë, të përdorim mundësitë që kemi në avantazhin tonë. Në të dy pjesët kam parë shumë gjëra të mira. Por në këtë situatë kemi këmbë të rënduara. Në mëngjes kishim një stërvitje me ngarkesa të larta fizike dhe tani këmbët janë pak të lodhura. Por mendoj se në përgjithësi ishte një paraqitje e mirë.”, tha Brdariç.
Duke folur për të rinjtë e ardhur në ekip ai tha:” Në përgjithësi jemi të lumtur se është fundi i javës dhe çdokush është i lodhur. Por mendoj se me Herliç kemi gjetur një lojtar të mirë dhe e tregoi për sa luajti, ndërsa edhe Ante në pjesën e dytë tregoi në disa raste se mund të jetë vendimtar. Mendoj se bëmë një punë të mirë. Ne kemi filluar punën por nuk kishim as Da Silvan dhe as Latifin, të cilët nuk mund të stërviteshin. Kemi lojtarë që mund të përfshijmë në lojën e ekipit. Nuk mund të ndryshojmë ekipin plotësisht, jam i kënaqur me çfarë kemi dhe mendoj se ky është ekipi për sezonin e ri.”
Sa i përket problemit të Da Silva, nëse do të jetë apo jo, pjesë e Vllaznisë, Brdariç, u përgjigj: “Po, do të jetë, mendoj se Viktor, është një lojtar i mirë për ne, ka treguar në sezonin e kaluar paraqitje të mira këtu. Pse nuk duhet të qëndrojë? Ai ka thënë në gazetë se i ka kërkuar Alban Xhaferit që të largohet nga klubi por mendoj se ka ndërruar mendje”.
Në vijim, Brdariç bëri të ditur se kuqeblutë do planifikojmë dy ndeshje të tjera miqësore për javën e ardhshme pëqr të qënë gati në sfidën e Superkupës që do të luajnë me datë 28 gusht ndaj Teutës në “Elbasan Arena”.
