Edmond Doçi, trajner i Vllaznia U-21 dhe ish-kampion i vendit me kuqeblutë, ka folur së fundmi për “Panorama Sport” mbi ecurinë e skuadrës shkodrane. Ish-mbrojtësi analizon ndeshjen e fundit ndaj Partizanit e po ashtu përmirësimet se çfarë mund të bëjë skuadra në javët e ardhshme. Ndër të tjera, ai thekson se këtë sezon Vllaznia i ka mundësitë për të realizuar një dopietë trofesh.
Doçi, Vllazni fituese ndaj Partizanit, e merituar apo jo?
Totalisht një fitore e merituar, që nga fillimi e në fund të ndeshjes ishte Vllaznia që dominoi dhe duke marrë suksesin. Shkodranët vrapuan shumë pavarësisht ndonjë episodi në favor të kundërshtarit. Në syrin tim, e bënë Partizanin të dukej si një ekip jo pretendent dhe që u shfaq shumë pak gjatë 90 minutave.
Ekipi më në fund u duk se bindi totalisht ndaj të kuqve, çfarë mund të përmirësojë skuadra?
Skuadra e Vllaznisë ka ardhur në rritje në performancë gjatë periudhës së fundit. Ka sidomos rritje të lojës në pjesën e dytë, që ishte një problem në dy fazat e para të kampionatit. Mund të përmirësojë tranzicionin negativ, kur kundërshtari sulmon, për të mos i lënë hapësira. Kjo sepse Vllaznia luan një lojë sulmuese dhe është gjithmonë në presing lart, kështu që duhet të jetë e përgatitur edhe pas në mbrojtje.
Skuadra nuk pësoi, sa i rëndësishëm është ky fakt për mbrojtjen?
Më pëlqen shumë një skuadër që nuk pëson gol ndoshta edhe nga fakti që kam luajtur si mbrojtës në karrierën time. Mospësimi i golit jep besim dhe siguri, jo vetëm te reparti i prapavijës, por tek e gjithë skuadra. Shumë pozitivisht ndikon, nga ana morale dhe psikologjike kur nuk pëson në portën tënde.
Grupi tashmë është thuajse i plotësuar në 100%, mund të krijojë kjo vështirësi për Brdariç për të zgjedhur titullarët?
Normal që ekipin çdo trajner do që ta ketë në 100% çdo herë. Pastaj është puna e trajnerit për të luajtur balancat që të marrin maksimumin nga çdo futbollist. Trajneri është gjithmonë nën presion, por puna e tij është të bëjë zgjedhjet e duhura. Duke aktivizuar lojtarët që janë më në formë dhe që mund të përshtaten më mirë ndaj kundërshtarit të radhës çdo fundjavë.
Mundet ky ekip të realizojë dopietën kampionat kupë këtë sezon?
Për momentin skuadra është totalisht brenda objektivave. Thuajse tashmë është siguruar 100% pjesëmarrja në kupat e Europës sezonin që vjen dhe ky është një plus i madh. Përsa i përket dopietës së trofeve, në mendimin tim, Vllaznia i ka të gjitha mundësitë për të arritur suksesin, por gjithmonë, duke qëndruar me “këmbë në tokë” dhe të përqendruar maksimalisht.
Kush mund të jetë ekipi më i fortë në rrugën drejt titullit kundër Vllaznisë?
Në “Final 4” unë nuk shoh asnjë ekip favorit apo mbi të tjerët. Forcat besoj se janë të barabarta mes skuadrave, me detaje ndoshta shumë të vogla që mund të bëjnë diferencën. Ekipi që është në 100% të formës së tij mund të përfitojë në ndeshjet finale të sezonit që përcaktojnë edhe fituesin e titullit.
Ndeshja e radhës me Tiranën. Si e parashikon “klasiken”?
Nuk është ndoshta ajo “klasikja” e shumë pritur, duke pasur parasysh formën e Tiranës. Patjetër që do jetë një duel i fortë, pasi në këto ndeshje luan fanella dhe nuk ka favoritë absolutë. Me formën dhe motivimin që ka, e shoh Vllazninë më afër fitores në ndeshjen ndaj Tiranës.
Endri ÇINARI