Profesor, ndeshja dhe fitorja ndaj Kukësit ju ka dhënë qetësinë e duhur patjetër
Fitorja e qetëson skuadrën shumë, qetëson ambjentin, më qetëson mua si trajner. Duke parë rrjedhojën e ndeshjes me Kukësin, ishte një sfidë që mund të mbaronte shumë më keq. Ishte një ndeshje që mund ta barazonim, ose ta humbsnim në minutën e 88′. Duke pasur parasysh një skuadër që luajti për rreth 60 minuta duke qenë e përqendruar, ky është problemi ynë kryesor. Nga minuta e 60 duhej të ishim të kujdesshëm, kishim dhe ne rastet tona si me Jonuzin dhe me Latifin, ne duhej ta çonim rezultatin në 2-0 dhe do të flisnim komplet ndryshe. Këto janë mësime që duhen nxjerrë që ne të rikuperojmë sa më shpejt. Problem fizik kishte, por problemi ishte se si ne duhet t’i neutralizojmë aksionet e kundërshtarit. I falënderoj të gjithë specialistët për vërejtjet që i kanë bërë skuadrës, sepse futboll pa gabime nuk ka.
Por, përballja me Kukësin ka lënë paksa pasoja në skuadër sa i përket disa dëmtimeve në skuadër
I vetmi lojtar që nuk është në lojë do të jetë Latifi, nga i cili po presim përgjigjet e ekzaminimeve mjekësore dhe ndodhet në Kosovë. Ka bërë rezonancë magnetike dje dhe deri ditën e hënë nuk do të dalë në stërvitje. Problemi i tij është hematoma, ku e ka shumë të zhvilluar në zonën e pulpës. Nuk e di sesa do të zgjasë dëmtimi i tij.
Kur mund ta shikojmë skuadrën të konsoliduar plotësisht?
Unë dua konsolidimin e skuadrës dhe për të bërë sa më pak gabime çdo ndeshje. Do të hidhemi në fushë ndaj Tiranës me një skuadër solide, futbolli i ka të treja rezultatet. Pavarësisht lëvizjeve, kemi treguar se jemi një skuadër me soliditet, një ekip që di të marrë rezultat, kjo shihet nga kualiteti i lojtarëve edhe nga mënyra e lojës.
Si një ish bardheblu me një karrierë të suksesshme, sfida ndaj Tiranës, padyshim ju sjell emocione
E pres me emocione këtë takim. Nuk është problemi si do ta pres unë këtë ndeshje, por futbollistët dhe çfarë objektivash kanë ata për këtë sfidë. Unë këtë duel do ta konsideroja një ndeshje ndaj Tiranës në shtëpinë e tyre, në ‘Selman Stërmasi’, gjë që Vllaznia ka ditur të marrë rezultat edhe herë të tjera. Ndryshimi i stadiumit nuk ka ndonjë problem.
Ndryshimi i stadiumit, nga “Air Albania” I planifikuar më parë, në “Selman Stërmasi”, pati ndonjë problem në skuadër?
Kam biseduar dhe di që gjendja e fushës është shumë e mirë dhe nuk ka asnjë problem.
Merkato u mbyll pa ndonjë surprisë për Vllazninë
Jemi më të përqendruar me këto lojtarë që kemi marrë sepse edhe shumë të tjerë kanë qenë pretendentë për ardhur në ekip.
Përballaja e nesërme duket si një “Superkupë”, pasi takohen, Tirana kampione dhe Vllaznia fituese e Kupës së Shqipërisë.
Në kampionat është problem tre pikëshi, Superkupa nuk ka pikë. Superkupën e kemi lënë për përpara Vitit të Ri.
