Që ky kampionat është ndër më të bukurit e viteve të fundit, është thënë edhe më herët. Pa as më të voglin diskutim, meritë për një gjë të tillë ka Vllaznia e Shkodrës, e cila me paraqitjet e saj fantastike të këtij sezoni ka surprizuar çdo kënd. Nga një skuadër mbijetese e sezonit të kaluar, u shndërrua në një skuadër lidër e kampionatit shqiptar duke prishur padyshim edhe planet e kalkulimet e disa skuadrave të tjera me peshë, të cilat ishin formatuar për fitimin e trofeve. Edhe pse u mund këtë javë, Vllaznia është përsëri aty, pretendente për titull dhe në të njëjtën kohë ka shtrirë njërën dorë edhe tek Kupa e Shqipërë ku është finaliste. Bardheblutë, me fitoren e sotme, jo vetem që stopuan Vllazninë e kreut duke e zbritur në vendin e tretë, por në të njëjtën lëshuan hapur presionin e titullit. Peshen e bardhebluve e ndjen edhe Teuta që pas fitores 2-0 me Kukësin e sheh veten përsëri në majë të renditjes, po ashtu edhe Partizani me Laçin që sot e mbyllen në barazim 2-2 duelin e tyre në stadiumin e Laçit.
Por, në të njëjtën kohë, po aq emocione dhe adrenalinë ka edhe në katin e poshtëm të tabelës së klasifikimit. Merita këtu shkon për Skenderbeun që theu sot Bylisin në një duel luftarak mbijetese të luajtur në stadiumin “Skenderbeu” duke e mundur 2-1. Por, jo vetem Skenderbeu, por edhe Apolonia që fitoi 2-1 me Kastriotin, e ndezën akoma më shumë luftën sportive duke mbajtur gjallë shpresat e mbijeteses në Superiore, edhe pse krutanët dhe ballshiotët janë disi më komod. Nëse këto dy skuadra do t’i mbyllnin me humbje ballafaqimet e tyre, atëherë mundësia e shpëtimit për to do të konsiderohej e mbyllur. Por ndodhi e kundërta, dhe fitoret e tyre e bëjnë edhe më të bukur konkurencën deri në fund të kampionatit.
E gjitha kjo do përligj atë që thamë më sipër që ky sezon futbollistik është më të spikaturit e futbollit shqiptar, që nëse nuk do t’i mungonin tifozëritë përkatëse në stadium, atëherë spektakli do të kishte qënë në pikat kulmore.