Kampionati Kombëtar i Futbollit amator, Kalçeto 5×5 që po zhvillohet për herë të parë në Rajonin e Shkodrës ka hyrë në një fazë shumë interesante. Ekipi Air Albania vazhdon të kryesojë me meritë tabelën e klasifikimit me 30 pikë, ndërkohë që rivaliteti për vendin e dytë është përqëndruar në mes dy ekipeve, Mançester dhe Panters, skuadra këto që do të përballen direkt këtë javë.
Sipas kordinatorit të FSHF-së për Rajonin e Shkodrës, Klazër Shkëmbi, përballja Panters – Manchester është planifikuar të luhet ditën e shtunë në Kompleksin Sportiv-Kalçeto Lici duke filluar nga ora 19:00.
Në prag të kësaj ndeshje, skuadra e Manchestër renditet në vendin e dytë me 18 pikë, ndërkohë që Panters është në vendin e tretë me një pikë më pak.Është kjo arsyeja që kjo sfidë e drejtpërdrejtë për marrjen e vendit të dytë po pritet me shumë interes, jo vetem nga dy kampet përkatëse, por edhe tifozëritë e tyre.
Krahas të tjerave, ndeshja në fjalë vlen edhe për realizimin e një objektivi madhor që ka të bëjë me pjesëmarrjen në finalet e Kampionatit të Kalçetos në shkallë kombëtare që zhvillohet në Tiranë, ku në garë do të jenë dy ekipet më të mira të grupeve përkatëse.