Basania FC-Luzi i Vogël 2008 3-2(Shënues: Nikshiqi 8′, Gjini 44’, Hoxhaj 45′ / Osma 37′, Greca 56′)
Grupi A i Kategorisë së Dytë ka luajtur pasditen e sotme tre ndeshjet e para të Javës së tretë. Ndër to, spikatjen më të madhe e ka bërë Basania, e cila ka sfiduar Luzin e Vogël 2008, një skuadër kjo me përvojë disa vjeçare në kategoritë inferiore dhe gjithnjë me pretendime serioze për t’u ngjitur në elitë.
Luzianët, të cilët në javën e parë mundën Shirokën në transfertë, kishin udhëtuar me të njëjtin objektiv edhe në Bushat për të marrë një tjetër tre pikësh të rëndësishëm.
Por, nuk kanë qënë të këtij mendimi futbollistët e Basanias, të cilët falë golave të shënuar nga Nikshiqi, Gjini, Hoxhaj, përkatësisht në minutat 8′, 44′, 45′, kanë bërë të pavlefshëm dygolëshin e Luzit me autorë Osma dhe Greca në minutat 37 dhe 56.
Jo vetëm rezultati, por ajo që ka shumë rëndësi, në ndeshjen e luajtur pasditen e së shtunës në fushën sportive të Bushatit, djemtë e drejtuar nga trajneri Dervish Haxhiosmanoviç kanë prezantuar një lojë cilësore, plot ritëm, qarkullim të topit dhe sulme të vazhdueshme në portën kundërshtare, çka tregon se ka filluar të ndiehet dora e teknikut malazez.
