* Pas më shumë se një muaji punime për rimbjelljen e barit të fushës së stadiumit, ndeshja Vllaznia-Dinamo ishte e para që u luajt në “Loro Boriçi”, duke e inauguruar me plot nëntë gola.
* Numri i tifozëve shkoi rreth 3000, edhe pse të shumtë ishin ata që ankoheshin për çmimet e biletave. Edhe nga kryeqyteti kishin udhëtuar për të ndjekur Dinamon një grup prej 50 tifozësh. Grupimi i tyre, “Blue Boys” është dëgjuar shumë pas shënimit të golit të parë.
* Ultrasit e Vllaznisë i kishin bërë një surprizë mbrojtësit të majtë shkodran, Ersin Hakaj, duke shpalosur një banderolë në të cilën shkruhej: “Hakaj! Linja e përpunimit të golave. Kur kundërshtarët të harrojnë, ne tifozët të kujtojmë”.
* Fallou Dianje shënoi golin e parë me Vllazninë dhe festoi në një mënyrë krejt origjinale. Ndërsa sulmuesi maqedonas, Gjurgjeviç, e feston golin me punonjësit e tjerë të klubit që ishin pas pankinës mike.
* Në tribunën qendrore ka pasur shumë ngacmime nga tifozët për kampin dinamovit. Ata e kanë cilësuar skuadrën e policisë, ndërsa kanë bërë një batutë për daullen që kishin marrë me vete: “Daulles i kanë ra përherë mirë…”. Ndërsa një tjetër me shumë humor shprehet se “shkopinjtë i kanë përdorë më mirë”.
* Në minutën e 60-të, Brdariç dhe Plori komunikojnë me Hakajn duke i kërkuar kujdes në prapavijë dhe sa më shumë vertikalizime për Aralicën.
* Nuk ka pushuar për asnjë moment së punuari me lojtarët e stolit përgatitësi atletik, bullgari i Vllaznisë, Mihail Tzokov. Po ashtu edhe italiani Daniele Nervi te Dinamo.
* Tension në shkallët e stadiumit në minutën e 73-të pas shënimit të golit të tretë të Dinamos. Lojtarët shkodranë dhe tifozëria pretendonin një faull ndaj Heriçit, që më pas largohet me barelë nga fusha e lojës. Në këtë moment boshnjaku merr duartrokitjet e tifozëve, ashtu si edhe vlonjati Ardit Hoxhaj që e zëvendësoi.
* Në minutën e 79-të kishte dy topa në fushë, por loja nuk u ndal nga ana e gjyqtarit.
* Supergoli i Fjoart Jonuzit ka shfrenuar atmosferën në shkallët e stadiumit dhe pankinën e Vllaznisë. Të gjithë në delir, madje Tomas Brdariç u fut në fushë dhe festoi si i çmendur me mesfushorin.
* Eni Imami dhe Aleksandar Isaevski u rikthyen si kundërshtarë në Shkodër. I pari bëri një gjest fisnik pas ndeshjes duke iu dhuruar fanellën tifozëve shkodranë, teksa konfirmoi respektin ndaj tyre.
* Liridon Latifi priti disa minuta pas ndeshjes të takonte trajnerin e Dinamos, Bledi Shkëmbi, me të cilin kanë qenë së bashku te Skënderbeu. Një takim i përzemërt, e më pas me lojtarin që ia hipi një monopatine dhe zgjodhi të shkonte me atë drejt banesës së tij në mbrëmje.
Admir Uruçi
