Prononcimi i trajnerit të Vorës, Arjan Bellaj, pas fitores me Tiranën, 3-1
“Ne nuk shohim shifrat, në radhë të parë dua të përgëzoj çunat për atë që kemi dhënë sot. Dhamë gjithçka me Partizanin, edhe sot. I thashë djemve që të fitojmë e marrim maksimumin në Superiore, duhet të japim gjithçka. Ne të tregojmë sikur kemi qenë në Superiore, me futbollistët me eksperiencë, me djem që vrapojnë, punojnë. Ky është rezultati, por nuk mbaron kampionati ynë këtu.
Isha i nevrikosur në pjesën e parë për dy veprime pasi e kemi punuar, e dinim si do dilte Tirana dhe e pësuam te ato që kemi punuar më mirë. Ndaj isha i mërzitur e fola me tone të ashpra, por pas zëvendësimeve, dihet që pësohet dobësim, Tirana rrezikoi gjithçka. Ne e kthyem me 5-4-1 rreshtimin dhe aty e humbëm pak fuqinë. Nuk jemi ne që të luajmë me ato tipare, por për të mbajtur e siguruar se Tirana e bëri lëvizjen me afrikanët përpara. Vendosa ta kthej ekipin dhe kjo bëri të humbim ritmin që kishin. Po të mos kishim të verdhë, nuk do i nxirrja, pashë shenja lodhjeje e thashë të mos i rrezikoj. Por edhe kush u futën, jam i kënaqur edhe me ata.
Merkato? Besoj se do të kemi edhe një blerje të re. Ishte këtu sot, pres edhe unë ta nxjerrin që kemi marrë një lojtar të ri. Me atë e mbyllim.
Tirana kishte parë pikat tona të forta, na e mbylli krahun e djathtë. S a u fut në lojë edhe Bardhi, kishim më mirë Karricën dhe na u nda loja në krahë. Por në pjesën e dytë, duke parë kundërshtarin e duke u folur, u thashë të jemi pak më shumë guximtarë, se kemi lojtarë të rrezikshëm, që janë mirë me shpejtësinë. Dhe këtë e bënë duke bërë diferencën, duke shënuar gola shumë të bukur, për meritë të Bardhit të dyja. E kishim ndërtuar që të shkonim andej se Tirana e ka mbrojtësin e majtë më të ngathët. Shkoi mbarë”, tha Bellaj për RTSH pas ndeshjes.
