Prej ditësh qarkullonin zëra që Akademia e Futbollit Vllaznia do t’i nënshtrohet një riorganizimi total të strukturave drejtuese dhe stafeve teknike. U fol shumë për emërimin e një specialisti italian në detyrën e drejtorit teknik të Akademisë Vllaznia, dhe së bashku me të do të bëheshin publikë edhe emrat e trajnerëve të rinjë në krye të ekipeve përkatëse.
Ditët e fundit ka qënë vetë klubi kuqeblu që njoftoi prishjen e akordit me specialistin italian, por megjithatë, drejtuesit klubi nuk humbën kohë dhe mbrëmjen e sotme kanë njoftuar zyrtarisht ndryshimet në listën e trajnerëve.
Sipas njoftimit përkatës të KF Vllaznia, bëhet e ditur se ndryshimet fillojnë që në ekipin U-21, ku vetëm pak ditë më parë nisi punën si trajner i parë Vioresin Sinani, por vendimi më i fundit emëron në krye të kësaj skuadre Ergi Borshin, i cili deri më tash ishte zëvendëstrajner në ekipin e parë të Vllaznisë përkrah Migen Memellit. Ndërkohë, Vioresin Sinani kalon në drejtimin e skuadrës U-19. Pjesë e vendimeve më të fundit janë edhe emërimet e Flanres Çakut dhe Alsid Tafilit në krye të ekipit U-17 dhe U-16.
Njoftimi zyrtar i KF Vllaznia
KF Vllaznia bën të ditur se përpos ekipit U21, duke filluar nga dita e nesërme do të nisin stërvitjen edhe ekipet U16, U17 dhe U19, ekipe të cilave u fillojnë më shpejt kampionatet. Për këtë arsye, ditën e sotme janë zyrtarizuar edhe emrat e trajnerëve që do të punojnë me to.
Konfirmojmë ndryshimin e pozicionit të z. Vioresin Sinani, i cili më parë ishte emëruar trajner i ekipit U21, por tani e tutje do të jetë në krye të ekipit U19, ndërkohë që ndihmës i tij do të jetë Malvin Meçarovi.
Ndërkohë, trajner i ekipit U21 emërohet Ergi Borshi dhe ndihmës i tij Fatjon Kadia.
Në krye të ekipit U17 është emëruar trajner Flanres Çaku, ndërsa trajner i ekipit U16 emërohet Alsid Tafili.
Njoftojmë të gjithë futbollistët se ekipet U16 dhe U17 do të nisin stërvitjen ditën e nesërme (e enjte) ora 16:00 në fushën sportive “Reshit Rusi”, ndërsa ekipi U19 do ta zhvillojë seancën e parë duke filluar nga ora 17:30.
Njëkohësisht bëjmë me dije se ekipet e tjera të Akademisë Vllaznia do të nisin stërvitjet shumë shpejt pasi klubi është duke menduar një riorganizim të strukturave drejtuese të Akademisë.
