Java e dytë e kampionatit të vajzave do të zhvillojë të pesta sfidat këtë të shtunë e të diel. Pesë takime që sigurisht premtojnë shumë emocione, teksa që në javën e parë, kampionati ka prodhuar shumë gola dhe lojë të fortë.
Vllaznia, nëntë herë kampione e Shqipërisë që konsiderohet si ekipi pretendent për titullin e 10-të radhazi, do të udhëtojë të dielën drejt Durrësit, ku do të luajë kundër Teutës. Një ndeshje e fortë, teksa në ndeshjet e javës së parë, dy skuadrat kanë fituar me goleada, duke u gjendur në kuotën e tre pikëve në kampionat. Krahas rëndësisë së kampionatit, për Vllazninë, kjo ndeshje është edhe si një test i fundit përpara sfidës shumë të rëndësishme me Realin e Madridit, ndeshja e parë në fazën e grupeve të Ligës së Kampioneve të Europës.
Ndërkohë, kjo fundjavë afron edhe derbin e kryeqytetit mes Tiranës dhe Kinostudios. Vajzat bardheblu të drejtuara nga Aurora Seranaj nuk e kanë bërë ende ‘sefte’ për këtë vit, teksa do të tentojnë të ‘rrëmbejnë’ tre pikëshin e parë ndaj Kinostudios, që një javë më parë u mund nga Apolonia në shtëpi. Ndeshja do të luhet në stadiumin ‘Selman Stërmasi’ në ora 14:00.
Ndërkaq, dy sfidat e tjera të së shtunës janë ato mes Lushnja – Skënderbeu, një përballje jo e lehtë për të dyja ekipet, që do të kërkojnë fitoren këtë javë. Kjo ndeshje është planifikuar të nisë në ora 12:00. Nga ana tjetër, Laçi do të ndeshet me Kukësin, teksa sfida do të nisë në ora 14:00.
Nga ana tjetër, ekipi tjetër i kryeqytetit, Partizani do të presë në shtëpi fieraket, në një sfidë që duket të jetë e vështirë për të dyja ekipet, duke parë edhe rritjen e tyre të vazhdueshme. Skuadrat do të kërkojnë fitore për të vijuar me ecurinë pozitive, teksa gjithçka do të mësohet nesër. Kjo ndeshje do të transmetohet edhe LIVE në kanalin e Youtube të Federatës Shqiptare të Futbollit.
Ndeshjet e javës së dytë të kampionatit të vajzave:
Lushnja – Skënderbeu, e shtunë, ora 12:00
Laçi – Kukësi, e shtunë, ora 14:00
Tirana – Kinostudio, e shtunë, ora 14:00
Teuta – Vllaznia, e diel, ora 13:00
Partizani – Apolonia, e diel, ora 13:00
