Trajneri i Partizanit, Arbër Abilaliaj ka folur për mediat në prag të sfidës kundër Vllaznisë, që do të luhet të mërkurë në orën 16:30 në “Loro Boriçi” dhe do të transmetohet drejtpërdrejt në RTSH 2. Tekniku pranon se “demat” nuk po kalojnë ditët e tyre më të mira, por siguron se Partizani nuk e diskuton praninë në “Final 4”.
“Në Superligën shqiptare të gjitha ndeshjet janë të vështira, kanë historinë e vet, episodet e veta. Përballë kemi një ekip, i cili është në situatë komode, lufton për objektivat e veta, ka pasur qëndrueshmëri gjatë sezonit. Ne i dimë shumë mirë cilësitë tona, kudo që të luajmë dhe shkojmë, do shkojmë për të marrë maksimumin.
Final Four nuk e kemi diskutuar asnjëherë, nuk dua ta diskutoj, pavarësisht si rrodhën ngjarjet në një ndeshje teke në Elbasan. Jam tejmase i bindur duke pasur parasysh dhe mënyrën si punojnë këto djem, kualitetin që ka gjithsecili prej tyre. Është moment siç e kanë pasur të gjitha skuadrat e tjera, moment për t’u kaluar, moment që na bën edhe më të fortë duke qenë bashkë me njëri-tjetrin, për të kaluar këtë moment negativ”, ka thënë mes të tjerash Abilaliaj.