Teuta nuk po kalon një situatë të mirë dhe sot, përballë Vllaznisë, do të kërkojë maksimumin. Luan në fushën e vet (ora 16:30) dhe të gjithë “bateritë” do të shkarkohen për të shkuar te fitorja që mungon prej javësh te “Djemtë e detit”. Trajneri i Teutës, Bledar Devolli, në një intervistë për “Panorama Sport”, ka theksuar me bindje se skuadra ka potencial për të mundur edhe një kundërshtar të vështirë, siç është Vllaznia. Ai u shpreh se në fushë do të jetë një Teutë që do të japë gjithçka për të marrë tri pikët.
Devolli, çfarë ka ndryshuar te Teuta që pas ardhjes tuaj?
Kam gjetur lojtarë të përqendruar, ambiciozë dhe me shumë dëshirë për t’u stërvitur. Jam i kënaqur, pasi po punojmë së bashku me klubin të gjithë për të bërë maksimumin në vazhdim.
Ndeshja e radhës ndaj Vllaznisë, a mund të konsiderohet momenti i së vërtetës për Teutën?
Kampionati sa vjen dhe vështirësohet. Mendoj se është vetëm ndeshja e radhës, për të cilën jemi përgatitur maksimalisht për ta fituar. Duhet ta kalojmë këtë moment.
A ka diçka që ju shqetëson në prag të kësaj ndeshjeje?
Gjendja e skuadrës duket shumë e mirë, atmosfera është pozitive dhe jemi gati për të bërë një performancë të mirë. Sigurisht, edhe për të marrë rezultat.
Si e shihni këtë përballje ndaj një Vllaznie që është në 4 vendet e para?
Në e dimë që është një ndeshje e vështirë. E vlerësojmë maksimalisht kundërshtarin, por kemi synimet tona, pavarësisht vështirësisë që paraqet ky 90-minutësh. Jam i bindur se do të japim më të mirën nga vetja që ta kalojmë me sukses Vllazninë.
Te dy ekipet vijnë nga humbja në kampionat. Sa besoni se do ta mundni Vllazninë?
Jemi të përqendruar tek ajo çfarë kemi përpara, duam vetëm 3 pikët dhe pak rëndësi ka ekipi kundërshtar, apo fusha ku luajmë. Teutës i bëjnë punë vetëm 3 pikët, ky është edhe qëllimi që kemi.
A është mbyllur merkatoja e Teutës, apo prisni ende diçka tjetër?
Në 24 orët e fundit kemi afruar dy lojtarë, Maçollin dhe Zhongon, duke plotësuar kështu organikën. Nuk dua të mendoj për merkaton tani, jam i fokusuar vetëm të ndeshja ndaj Vllaznisë.
Zamir QYPI
