Është shpallur kampion si lojtar dhe trajner me Vllazninë. Hysen Dedja, një nga figurat e njohura të futbollit shkodran ka dhënë një intervistë së fundmi për “Panorama Sport”.
Ish-mbrojtësi është ndalur tek ecuria e kuqebluve dhe fitorja e fundit kundër Tiranës. Po ashtu, ai thekson në fjalët e tij, që ky mund të jetë viti i duhur, për shkodranët të shpallen kampionë.
Profesor, si ju është dukur Vllaznia këtë kampionat?
Të them të drejtën ekipi nuk ka qenë totalisht i stabilizuar gjatë gjithë këtyre javëve. Shoh një rritje në javët e fundit, më duket sikur skuadra po futet në ritmin e duhur dhe siç thuhet në futboll “po ngroh motorët”. E patjetër që kjo kënaq në Shkodër dhe të gjithë ata që duan Vllazninë.
Ndeshja e radhës me Skënderbeun në Shkodër. Si e mendon Dedja?
Nëse një skuadër do të dalë kampion duhet t’i vlerësojë njësoj gjithë kundërshtarët. Si Partizanin që momentalisht është në krye dhe Bylisin që është në vendin e fundit. Prandaj edhe Vllaznia nuk duhet të nënvlerësojë kundër Skënderbeut dhe të marrë fitoren në shtëpi, ku para publikut shkodran ka detyrën të bëjë mirë gjithmonë.
Endri ÇINARI