Futbollisti i mirënjohur shkodran Hamdi Salihi është përzgjedhur nga Federata Ndërkombëtare e Historisë dhe Statistikave në Futboll, IFFHS në listën e yjeve të futbollit botëror.
Federata në fjalë ka publikuar renditjen e 50-të golashënuesve më të mirë të shekullit 21-të, ku Hamdi Salihi është i renditur në vendin e 28-të me 218 gola të shënuar gjatë karrieres së tij sportive.
Cristiano Ronaldo kryeson renditjen e golashënuesve më të mirë evropianë në shekullin XXI në ligat kombëtare pas fundit të vitit 2024. Portugezi ka shënuar 557 gola në shekullin aktual. 48 lojtarë të tjerë kanë arritur shifrën e 200 golave, mes të cilëve është edhe Salihi me 218 gola.
Hamdi Salihi mbetet ndër figurat më të spikatura të futbollit shqiptar, ku krahas Vllaznisë, klubit ku u formua si futbollist, ka luajtur me shumë sukses edhe me Tiranën dhe Skënderbeun në kampionatin shqiptar, për të vijuar më pas me një karriere shumë të pasur në arenën ndërkombëtare në Europë dhe deri në Shtetet e Bashkuara të Amerikës.
Falë gjithë vlerave që disponon, Hamdi Salihi është pjesë e stafit teknik të Kombëtares së Shqipërisë në drejtimin e brazilianit Sylvinjo, ku vetëm pas pak ditësh nisin aventurën e ndeshjeve kualifikuese për Kupën e Botës, me një supersfidë, siç është ajo me Anglinë në transfertë.
