Vllaznia U17-Skënderbeu U17 2-0(Shënues: Aris Ara 83’, 90+2’)
Formacioni i Vllaznisë: Lekaj, Meta, Marashi, Kubazi, Toni, Ara, Gerbeti, Hoxha, Sylia, Smakaj, Çelepia.(U aktivizuan: Kapllanaj, Ivziku, Guri). Trajner: Gilman Lika
Akademia e Futbollit Vllaznia për kategorinë U-17 është kampione e dimrit. Këtë titull simbolik 17 vjeçarët kuqeblu të drejtuar nga trajneri i tyre Gilman Lika dhe kolegu i tij Denis Zmijani, e arritën pasi mundën në ndeshjen e fundit për vitin 2022, Skënderbeun e Korçës me rezultatin 2 me 0. Me këtë fitore e vlefshme për javën e 12-të të Superligës së moshave, Vllaznia U-17 shkon në kuotën e 29 pikëve duke kryesuar Kampionatin Kombëtar. Në ndjekje të kuqebluve janë Teuta me 27 pikë, Tirana me 24 pikë, Dinamo me 22, Skënderbeu 16, Apolonia 14, Internacional 12, Partizani 11, AF Tirana 11 dhe Laçi i fundit në renditje me 2 pikë.
90-të minutat e fundit të vitit 2022, 17 vjeçarët kuqeblu i luajtën të martën në stadiumin “Reshit Rusi” të Shkodrës përballë bashkëmoshatarëve të tyre korçarë, Një ndeshje kjo e dominuar tërësisht nga kuqeblutë, ku për fitoren ka menduar talenti Aris Ara.
Megjithatë, duhet thënë se fitorja e kësaj ndeshje që i dha tre pikëshin shumë të rëndësishëm Vllaznisë U-17 ka ardhur në dhjetë minutat e fundit të krejt ndeshjes. Deri në minutën e 83-të, ndeshja ka qënë e mbërthyer në shifrat e bardha 0 me 0. Pikërisht në këtë minutë, del nës skenë talenti Aris Ara, i cili gjatë një depërtimi në zonën korçare pengohet në mënyrë të parregullt nga mbrojtja mike, dhe gjyqtari kryesor Çokaj nuk nguron të akordojë penallti. Tekniku Lika ia beson ekzekutimin Ares, pikërisht atij që e mori penalltinë, dhe Arisi tregohet i saktë duke tundur rrjetën e portjerit korçar Demirshah.
Koha e rregullt mbyllet me avantazhin e Vllaznisë 1-0, ndërkohë që në kohën shtesë do të jetë përsëri Aris Ara, që duke shënuar golin e dytë vulos fitoren e Vllaznisë U-17 me rezultatin 2-0 duke konfirmuar se ishte dita e tij në këtë ndeshje.
