Partizani-Teuta 1-1(Shënues: Cara 9’/Lloci 95’)
Ashtu siç parashikohej, sfida në mes Partizanit dhe Teutës, është zhvilluar me një luftë të fortë sportive dhe me shumë rivalitet, nga minuta e parë deri në fundin e minutave shtesë.
Takimi i luajtur mbrëmjen e sotme në stadiumin “Arena e Demave” të kryeqytetit ka filluar me gol, kur që në minutën e nëntë Cara kalon në avantazh Partizanin duke krijuar përshtypjen se të kuqtë do ta kishin të lehtë fitoren e kësaj ndeshje.
Por, në fushën e lojës është parë një Teutë e vendosur dhe shumë këmbëngulëse, e cila nuk u pajtua në asnjë moment me disavantazhin. Me zëvendëstrajnerin Bledar Hodo në pankinë dhe trajnerin e parë Edi Martini në tribunë që vuante dënimin e kartonit të kuq marrë javën e kaluar me Elbasanin, durrsakët e kërkuan me ngulm golin e barazimit, të cilin e arritën pikërisht atëherë kur Partizani mendoi se mori tre pikët e kësaj ndeshje.
Saktësisht, ka qënë minuta e 95-të e takimit, kur si rezultat i një presioni të futbollistëve durrsakë, Teuta fiton një penallti për prekje të topit me dorë, të cilën e shndërron në gol Lloci. Pas sekonda më pas vjen vërshëllima përfundimtare e arbitrit kryesor Albert Doda duke e mbyllur të gjithë ndeshjen me rezultatin e barabartë, 1-1.
Një barazim që ka brenda jo vetem përforcimin e pozitave të Teutës në renditje, tashmë me 16 pikë, po aq sa ka edhe Elbasani i vendit të pestë, por në të njëjtën kohë i shërben edhe Vllaznisë, e cila merr kryesimin e kampionatit me 21 pikë, po aq sa ka edhe Partizani i vendit të dytë.
Një favor ky që i vjen Vllaznisë edhe nga dy ish të saj, si Ari Kruja dhe Antonio Marku, titullarë dinjitozë të formacionit durrsat. Dhe, së bashku me to, padyshim edhe një ish tjetër kuqeblu, si trajneri Edi Martini, por pa lënë mënjanë edhe Kristian Preknikaj, një shkodran tjetër, i rritur në futbollin italian që po aktivizohet me sukses në radhët e Teutës.
