Kombëtarja e Kosovës ka pësuar humbje në ndeshjen e parafundit kualifikuese për Botërorin “Katar 2022”. Dardanët janë mundur nga Gjeorgjia, të martën në mbrëmje, në stadiumin “Fadil Vokrri”, me rezultat 1:2.
Ndonëse gjatë tërë kohës ishin dominues ndaj kundërshtarit, në fund fitores iu gëzuan mysafirët, që arritën të shfrytëzojnë në maksiumum gabimet e ekipit tonë. Gjeorgjianët kaluan në epërsi në minutën e 11-të, kur Tornike Okriashvili shfrytëzoi gabimin e portierit Arijanet Muriq. Shifrat i barazoi Vedat Muriqi nga penalltia në minutën e 45-të, pasi paraprakisht Rashica u ndal në mënyrë të palejueshme.
Në pjesën e dytë Dardanët u përpoqën me çdo kusht për të gjetur golin e fitores dhe kjo ndikoi që të ketë hapësira në mbrojtje, gjë të cilën e shfrytëzuan mysafirët, duke shënuar edhe golin e dytë dhe të fitores në minutën e 82-të përmes Zuriko Davitashvilit, me gjuajtje me kokë pas harkimit të Azarovit.
Pas kësaj humbje, Kosova mbetet në pozitën e parafundit në renditje, me 4 pikë, sa ka edhe Gjeorgjia në pozitën e fundit. Ndeshjen e fundit në kuadër të këtij cikli kualifikues Dardanët e zhvillojnë në muajin nëntor në Athinë kundër Greqisë.
