Trajneri i Bylisit, Mirel Josa, ka qenë pjesërisht i kënaqur me lojën e skuadrës së tij në barazimin 3-3 ndaj Flamurtarit.
“Si shkoi ndeshja, dy herë në disavantazh, jam i kënaqur. Shuam një disavantazh me dy gola, pësuam përsëri, por jam i kënaqur. Duhej të qetësonim lojën, duhej të ishim këmbëngulës, patëm probleme me kartonët që morëm se na futën në ankth sa i përket vazhdimësisë së lojtarëve që u dëmtuan me kartonë. Them se në përgjithësi ishte një lojë që mund të merrte drejtim të menjëhershëm, siç mori me Flamurtarin, mund të merrte ne favorin tonë, sidomos në fund kur loja u hap e skuadra nuk u përqendrua shumë.
Futëm Muktar, që është i shpejtë, rolin e ka mbrojtës i majtë. Nuk është se jam i kënaqur plotësisht. Por e lamë në lojë e të shihnim se ndërrimet në sulm i kishim me pikatore. Mua më pëlqeu loja e Ualison i cili në të dy pjesët diti të kërkojë topat në thellësi shumë mirë.
Skuadra u bë shumë herë më e shpejtë kur nisnim topin nga mbrapa. I kishim provuar të dy këto zgjedhje, por vendosëm të luajmë në krahë.
Duhej një koordinim më i mirë, një mosndërhyrje, apo si mund ta zgjidhim këtë punë. Nuk ishte vetëm ai problemi. Duhej të ishim më fleksbël, sidomos kur Flamurtari mundohej të organizonte nga poshtë me dalje para të Trashit, apo pozicionin e Rodrigues, te ai duhej presion i lartë, duke mos e lënë të pasonte thjesht. Përgjoni duhej të shkonte, por në kohën e duhur.
E para besuan lojtarët vetë që mund të ndodhte diçka kur u hap loja, kur u çrregullua, se pat çrregullim. Siç mund të shënonim ne, mund të shënonte edhe Flamurtari, duke pasur parasysh edhe rastin e Përndrecës që zotëroi topin me dorë, me faullet e Markut dhe Trashit. Por nuk jam i kënaqur në përgjithësi jo vetëm nga mbrojtja, por të gjitha veprimet tona mbrojtëse. Nuk ka mundësi që në goditje këndi të kërcejë vetëm një e të pësojmë golin e tretë. Ai ishte goli që na uli, por ishte iniciativa e ekipit që dolëm në sulm për të barazuar”, tha Josa për RTSH pas ndeshjes.
