Klubi i Futbollit Vllaznia ka vendosur të aplikojë këtë sezon futbollistik abonetë për tifozët kuqeblu të interesuar për të ndjekur ndeshjet e Vllazninë që do të luhen në stadiumin “Loro Boriçi”. Lajmi në fjalë është publikuar zyrtarisht ditë më parë, kur edhe kanë filluar të kryejnë veprimet përkatëse shumë tifozë. Ndërkohë, tashmë kur na ndan një javë nga zhvillimi i ndeshjes së parë në shtëpi, asaj Vllaznia-Teuta, KF Vllaznia rikujton opinionin publik se proçedura e shitjes së aboneve sezonalë vazhdon edhe në ditët në vazhdim. Dhe, me këtë rast risjellë në vemendje edhe tarifat financiare sipas tribunave përkatëse.
RIKUJTESË
Të nderuar tifozë të Vllaznisë!
KF Vllaznia dëshiron t’iu informojë se edhe kesaj jave vazhdon shitja e aboneve sezonalë, e vlefshme për të gjitha ndeshjet që ekipi ynë do të luajë në stadiumin “Loro Boriçi”.
Në vlerën e abonesë është llogaritur çmimi i biletave me zbritje prej 30 % nga çmimi i biletës normale dhe kjo është bërë për 20 ndeshje (18 ndeshje të kampionatit dhe 2 ndeshjet e tureve të para të Kupës së Shqipërisë) ndërkohë që ndeshjet më të rëndësishme të Kupës do jenë sërish bonus për tifozët që do të bëjnë abonimin sezonal.
Çmimet sipas tribunave për abonetë e sezonit 2021-2022 janë si më poshtë:
Tribuna VIP 20 000 lekë
Tribuna A+ B 14 000 lekë
Tribuna D2-D3 10.000 lekë
Tribuna D1-D4 7.000 lekë
Tribuna C dhe E 4.000 lekë
Të gjithë tifozët e interesuar duke filluar nga dita e nesërme nga ora 09.00- 12.00 dhe më pas, nga e hëna deri të premten çdo javë, të paraqiten pranë zyrave të KF Vllaznia tek stadiumi “Loro Boriçi”. Ata duhet të kenë me vete një kartë identiteti ose pasaportë, një foto personale si dhe do të plotësojnë një formular.
Të interesuarit mund të telefonojnë edhe në numrin e telefonit +355 67 523 6981
Po ashtu, klubi ka menduar edhe krijimin e një sektori- zone në tribunën qendrore, e cila do të jetë vetëm për familjarët. Për ta përfituar atë, minimumi i shitjes së aboneve është 2 copë.
Me gjithë këto veprime, KF Vllaznia kërkon të lehtësojë sa më tepër hyrjen dhe akomodimin e tifozëve ne shkallet e stadiumit për sezonin e ri futbollistik.
Forca Vllaznia!
