Për të gjithë ekipet sportive, muaji Janar shënon rikthimin në stervitje dhe përgatitjen fizike për fazen e dytë të kampionatit, por Vllaznia U18 në volejboll për femra ka ndërprerë stervitjen!
Siç bëhet e ditur nga stafi teknik, ekipi i Vllaznisë U18 tashmë nuk ka ambiente për t’u stërvitur, pasi palestra që deri në Dhjetor të vitit të kaluar sterviteshin, do të hyjë në fazen e rikonstruksionit.
Sapo janë njoftuar për një lajm të tillë, stafi ka kontaktuar menjëherë Bashkinë Shkodër, ku së bashku me prindërit e vajzave që sterviten çdo ditë, kanë kërkuar takime dhe u janë drejtuar përmes email-it, me qëllim gjetjen e një zgjidhje përpara nisjes së Janarit. Fatkeqësisht, kërkesat e tyre nuk kanë marrë përgjigje dhe sot një ekip i cili, është pretendent, dhe ka për qëllim të formojë bazen e ekipit të të rriturave, ndodhet në një situatë që vetem e dëmton të ardhmen e volejbollit shkodran për femra.
Trajnerët Dorjan Tafa, Ferdinand Bardeli, Fatjet Haxhagiç dhe Gersi Jula, shprehin keqardhjen e tyre për këtë situatë. Ato prej vitesh kanë punuar me ekipet e moshave dhe të rriturave, (ku me ekipin Vllaznia U20 sollën dy kupa në Shkodër në Kampionatin e sezonit 2021-2022), dhe synojnë ndërtimin e një Akademie të vertete volejbolli shkodrane përmes grumbullimit të rreth 120 fëmijëve për stërvitjen e tyre. Puna me ekipin e Vllaznia U18 ka qënë intense, jo vetem me stërvitje e përgatitje fizike por edhe përmes pjesmarrjes në Turne Ndërkombëtare me qëllim, rritjen e vajzave profesionalisht.
Por, sot ekipi U18, U16 dhe të gjithë fëmijët e tjerë gjenden në një udhëkryq: prej fillimit pa mbështetje financiare nga Bashkia Shkodër, por tashmë dhe pa një palester për zhvillimin e seancave stërvitore.
(Video) Pamje nga stërvitja në palestër gjatë muajit të kaluar, përpara se të mbyllej në fillimin e vitit të ri 2025.
