Arjon Kajoshi, është boksieri më në formë për momentin në boksin shqiptar. Pas titujve radhazi në boksin amator, Kajoshi ka nisur rrugën e bukur por edhe të vështirë të boksit profesionist. Dhe, karriera e tij në profesionizëm po vazhdon në mënyrën më të mirë, për të cilën flasin edhe rezultatet në fjalë, ku nga 13 ndeshje të zhvilluara ka arritur të realizojë 13 fitore, ku 8 prej tyre janë me KO.
Fitorja e fundit është ajo e realizuar në Turneun Ndërkombëtar “Memoriali i boksit Vllaznia 2024”, aktivitet i cili i kushtohet ish boksierëve shkodranë që sot nuk jetojnë, i cili në këtë edicion ishte konceptuar ndryshe duke pasur në konkurimin e katër çifteve të boksierëve profesionistë.
Ndër to, spikatjen më të madhe e ka pasur çifti i peshës deri në 76 kg, në mes shkodranit Arjon Kajoshi dhe bullgarit Heistian Hrystov. Një ndeshje kjo, e cila në të gjashtë raundet e saj profesioniste ishte shumë e dyluftuar nga të dy boksierët në fjalë. Pas tre raundeve deri diku edhe të barabarta, në të katërtin, të pestin dhe të gjashtin kampioni kuqeblu Arjon Kaloshi ka bërë gjithçka mirë duke e shndërruar në spektakël ndeshjen e tij. Ndaj, edhe në përfundim të krejt ndeshjes, gjyqtaria ishte unanime duke i dhënë fitoren e merituar me rezultatin, 5 me 0.
Krahas të tjerave, fitorja në fjalë është përshëndetur edhe nga kryetrajneri i kombëtares së boksit Zef Gjoni, i cili punon prej vitesh me këtë boksier në palestren e Vllaznisë.
Sipas trajnerit Gjoni, niveli boksimit nga ana e Kajoshit në Memorialin Vllaznia 2024 përballë bullgarit Hrystov ishte në nivel klasi dhe ndër ndër të mirat e deritanishme nga boksieri shkodran, duke garantuar një të ardhme të shkëlqyer të karrieres së tij sportiv.
Në duelet e tjera profesioniste të Memorialit Vllaznia 2024, spikatën edhe dy boksierët e tjerë shqiptarë, Fabio Kaçiu dhe Ariol Zeneli, të cilët fituan ndaj kundërshtarëve të tyre Mikhail Khutuishvili dhe Rosha Donchenko.
Ndeshjen e plotë të boksit profesionist, në mes shkodranit Arjon Kajoshi dhe bullgarit Heistian Hrystov, mund ta ndiqni në kanalin tonë zyrtar, Veriu Sport-YOUTUBE.
Gaspër MARKU
