Vllaznia vazhdon të jetë dominuese e sportit të gjimnastikës artistike. Ekipi kuqeblu i drejtuar nga trajneri Izmir Kashi dhe kolegja e tij, Shpresa Salja ka qënë më i miri në garat e Kampionatit Kombëtar të gjimnastikës artistike të moshave zhvilluar këtë fundjavë në qytetin e Shkodrës.
Këtë radhë, aktiviteti i organizuar nga Federata Shqiptare e Gjimnastikës ka qënë disi ndryshe nga ato të mëparshmit, pasi presidenti Leonard Lulaj, bëri të mundur që për herë të parë në një aktivitet kombëtar shqiptar të gjykojnë tre gjyqtarë të huaj, ndërkohë që i pranishëm ka qënë edhe kampioni i botës, rusi me pasaportë shqiptare, Matvei Petrov i cili demonstroi përpara të pranishmëve një ushtrim special në kalin me doreza.
Duke u kthyer tek garat, gjimnastët shkodranë fituan trofetë, si ekip dhe si individë. Në klasifikimin ekipor, Vllaznia u shpall kampione për kategorinë e moshës 9-10 vjeç dhe 13-14 vjeç, ndërkohë që zuri vendin e dytë për kategorinë 7-8 vjeç.
Në konkurimin individual, titullin kampion nga ekipi i Vllaznisë sipas grupmoshave përkatëse e merituan: Mishela Bitanji, Merili Islami, Klea Marku, Devis Ndoja, Oerdi Metani, Paulo Zefi. Ndërkohë që figurë të mirë sportive bënë edhe Angela Preka, Viktoria Simoni, Sara Moleci, Eduard Zefi, të cilët u renditen në vendi i trete, si dhe Serena Kraja në vendin e tretë.
Pjesë e rëndësishme e këtij aktiviteti ishte edhe nderimi që Federata Shqiptare e Gjimnastikes bëri për disa nga figurat më të spikatura të Vllaznisë në vite duke shpërndarë çertifikata “Mirënjohje” për dhjetë gjimnastë: Sadetin Fishta, Vjollca Media, Vuke Zako, Vlash Radoja(Pas vdekjes), Gjovalin Mikeli(Pas vdekjes), Satber Tula, Ivzi Bushati, Mimoza Bregu, Greta Bojani, Lec Nika.
(Video) Pamje nga Kampionati Kombëtar i Gjimnastikës Artistike të moshave zhvilluar në Shkodër, si dhe momnti i dekorimit të 10-të gjimnastëve kampionë të Vllaznisë në vite.
Gaspër MARKU
