AS Himara-KF Shiroka 2-6(Shënues: /Eduard Shehu 15’, Sibusiso Buthelezi 68’/Klaudio Kodra 8’, Mersian Muliu 10’, 77’, Seth Vincent 27’, Gabriel Ogungbire 65’, Daniel Micheal 87’)
Për Klubin e Futbollit Shiroka, duket se po vijnë ditë të mira. Përkushtimi në proçesin nën drejtimin e trajnerëve Fatmir Axhani dhe Valmir Kurti, si dhe mbështetja e vazhdueshme nga ana e presidencës në krijimin dhe plotësimin e kushteve optimale po jep frytet e duhura.
Kjo është reflektuar sidomos në dy ndeshjet e fundit, fitore ndaj Klosit në shtepi 4-0 dhe dhe po kështu fitore ndaj Himarës 2-6, ku krahas gjashtë pikëve vlen edhe golaverazhi pozitiv 10 me 2.
Përballja me himariotët, ndeshje kjo e prapambetur për llogari të javës së gjashtë të Kategorisë së Tretë, është luajtur pasditen e së mërkurës në transfertë, në një fushë asnjanëse si ajo e “Skender Halilit” të kryeqytetit.
Një ndeshje që në fakt është dominuar nga fillimi deri në fund nga klubi shirokas me tre gola në secilen pjesë. I pari që ka hapur serinë e golave ka qënë Klaudio Kodra, i cili në minutën e tetë shënon një supergol përmes një ekzekutimi mjeshtror të një goditje dënimi, për të vijuar më pas me Mersian Mulinë dhe afrikanin Seth Vincent, përkatësisht në minutat 10-të dhe 27-të.
Për t’u theksuar është se himariotët arritën të shënojnë golin e parë të tyre në minutën e 15-të me anë të Eduard Shehut duke shkurtuar diferencen e disavantazhit të 1 me 2, por shirokasit e mbyllin pjesën e parë me rezultatin 3 me 1 në favor të tyre.
Ndërkohë, edhe pjesa e dytë ka këtë pamje, pasi ashtu si edhe në të parën, Shiroka shënon tre herë, fillimisht me Mulinë që fikson dopietë në këtë ndeshje si dhe dy afrikanët Gabriel Ogungbire 65’ dhe Daniel Micheal 87’, ndërkohë që për Himarën që në këtë ndeshje ishte pritëse, golin e vetëm në këtë pjesë dhe të dytin për 90-të minuta e shënoi Sibusiso Buthelezi 68.
Përfundimisht, e gjithë ndeshja është mbyllur me rezultatin 2 me 6 në favor të Shirokës, fitore kjo që e çon atë në kuotën e 10-të pikëve. Ajo që është më e rëndësishme ka të bëjë me rritjen e ndjeshme në tabelë të Klubit të Futbollit Shiroka, i cili pas një luhatjeve të javëve të mëparshme, tashmë është brenda tre skuadrave kryesuese të kampionatit, pas kryesueses Eagle dhe Partizanit B, përkatësisht me 14 dhe 13 pikë.
(Video) Ndeshja, AS Himara-KF Shiroka 2-6. Kategoria e Tretë, java e 6-të
https://youtu.be/EETc_G5PLrI?t=41
