Pa as më të voglin dyshim duhet thënë se zbulimi i vitit 2024 në radhët e Vllaznisë ka qënë Kevin Dodaj. Talenti i sulmit kuqeblu bindi trajnerin Brdariç t’i japë minuta në fushën e lojës dhe shumë shpejt edhe vendin e titullarit, të cilin Dodaj ia shpërbleu me shënimin e 4 golave dhe dy asistëve.
Përpos kësaj, Dodaj u bë pjesë edhe ekipit kombëtar U19 si dhe U21 duke bërë paraqitje të mira, ku të gjitha së bashku bënë që ai të përzgjidhet në formacionin më të mirë të vitit 2024.
Katër golat dhe dy asistët e Dodajt në këtë pjesë të parë të kampionatit janë një tregues shumë pozitiv për të, ndërkohë që deri në fund të sezonit, premton se numri i golave të tij do të shkojë në dyshifror.
Për Dodajn, bashkëpunimi me kapitenin Bekim Balaj është një shans dhe privilegj për të duke marrë më të mirën prej tij, jo vetëm në fushën e lojës, por edhe jetën jashtë fushës ku ai është një model që duhet ndjekur.
Shumë shpejt, të premten e ardhshme kuqeblutë luajnë ndeshjen e parë të vitit 2025, me klasiken Vllaznia-Tirana, të cilën Dodaj po e pret me padurim për të dhënë më të mirën në fushën e lojës, pse jo edhe me ndonjë gol fitoreje.
(Video) Prononcimin e plotë në video të sulmuesit 19 vjeçar, Kevin Dodaj, mund ta ndiqni në kanalin tonë zyrtar Veriu Sport-YOUTUBE.
Gaspër MARKU
