(Video) KF Shiroka prezanton trajnerin e njohur Matias Tatangelo. Argjentinasi, zhvillon stërvitje me skuadrën dhe jep prononcimin e parë mediatik

Dita e djeshme është shoqëruar me zhvillime të reja për KF Shiroka. Bëhet fjalë për trajnerin e njohur argjentinas Matias Tatangelo, i cili nga selia e klubit në Grand Hotel Europa ku ka firmosur kontratën me drejtuesit e Klubit të Futbollit Shiroka të Kategorisë së Tretë menjëherë është drejtuar për në stadiumin “Reshit Rusi” të qytetit të Shkodrës, aty ku në prezencë të presidentit Ergi Axhani dhe menaxherit Ervis Domnori, është prezantuar me skuadrën shirokase.
Pas mesazhit që ai i ka dhënë lojtarëve për një bashkëpunim dhe karikim në fazën e dytë të kampionatit, futbollistëve shirokas i ka folur edhe presidenti Ergi Axhani, i cili i ka bërë të ditur skuadrës se së bashku me trajnerin Tatangelo do të punojnë për të sjellë edhe përforcime të tjera në skuadër në mënyrë që ky sezon të prezantojë në fushë një KF Shirokë krejt tjetër, më luftarake dhe që të rritet ndeshje pas ndeshje për të përmbushur realizimin e objektivit të kualifikimit në kategorinë e dytë.
Më pas skuadra me në krye teknikun argjentinas Matias Tatangelo, ka vijuar proçesin stërvitor në tapetin e “Reshit Rusit”, ndërkohë që argjentinasi ka dhënë prononcimin e tij të parë mediatik si trajner i KF Shiroka.
Ndërsa thekson se e ka pritur me kënaqësi ofertat e menaxherit Ervis Domnori dhe presidentit Ergi Axhani, argjentinasi Matias Tatangelo bën të ditur se vjen për herë të parë në Shkodër dhe Shqipëri.
Gjithashtu, ai tha se përvojën shumëvjeçare që ai ka kaluar në drejtimin e disa skuadrave në Superligën e Ekuadorit, Peru, Kolumbi dhe Argjentinë, do ta vërë në shfrytëzim më së miritashti në radhët e KF Shiroka për realizimin e objektivave të vendosur nga drejtuesit në kualifikimin një kategori më lart.
Sa i takon opinionit për skuadrën, ai vlerësoi elementin që ka në dispizicion, ndërkohë që bërë të ditur se së bashku me stafin po punojnë për përforcimin e skuadrës me elementë të tjerë cilësorë.
(Video) Prononcimin e plotë mediatik në video të teknikut të ri KF Shiroka, argjentinasit Matias Tatangelo, si dhe pamje nga seanca stërvitore nën drejtimin e tij, mund t’i ndiqni në kanalin tonë zyrtar, Veriu Sport-YOUTUBE.
Gaspër MARKU