Është ndarë nga jeta në moshën 80-të vjeçare ish futbollistin e Vllaznisë së viteve 70-të, Ramadan Komi. Komuniteti i sportit shkodran, e veças ai i futbollit ka humbur një emër të njohur, i cili i përket një brezi të shquar të futbollit shkodran, duke luajtur përkrah Sabah Bizit, Frederik Çapalikut, Zija Danit, Deto Zmijanit, Selami Danit, Hajrullah Lekës, Esat Rakiqit, Menduh Dedjes, Nikoll Gjergjit, Halil Pukës, Kol Gjonit, Zuk Qiricit, Jonuz Telit, etj, duke mos lënë në harresë edhe ish futbollistin e njohur tiranas, Ali Mema, i cili kryente shërbimin ushtarak në Shkodër.
I spikatur si mesfushor, por edhe sulmues, duke shënuar gola përcaktues për ekipin tij, pjesës më të madhe të karrieres së tij sportive, Ramadani, e kaloi me uniformën kuqeblu të Vllaznisë. Por, krahas kësaj, Ramadan Komi luajti me sukses edhe me Partizanin.
Ramadan Komi ishte pjesë e një familje sportive, ku së bashku me të vëllanë e tij më të vogël Smajl, ose Il Komi që njihet në opinionin sportiv, kanë qënë shumë të njohur, i pari me futbollin dhe i dyti me gjimnastikën dhe notin, ndërkohë që për shumë vite ishte drejtues në Klubin Sportiv Vllaznia.
Pasionin për sportin, Ramadani, ia përcolli edhe djemve të tij, Ilirit, Saimirit dhe Sojonit, të cilët në periudha të ndryshme ishin pjesë e ekipeve të futbollit Vllaznia.
Respektin për figurën e Ramadan Komit e shprehën më së miri edhe qytetarët shkodranë, dhe sidomos veteranët e sportit dhe tifozët kuaqeblu, të cilët me shumë mirënjohje për të dhe familjen e tij ishin pjesë e ceremonisë së përcjelljes për në banesën e fundit duke kujtuar.
Në shenjë respekti dhe konsiderate për ish kolegun e tyre Ramadan Komi që ndërroi jetë në moshën 80-të vjeçare, jo vetëm për karrieren sportive të tij, por edhe vetitë shembullore që ai kishte si qytetar dhe familjar model, flasin dy veteranët e sportit, Ahmet Meta dhe Rauf Çanga.
Ndërkohë, me keqardhje të madhe e ka përjetuar humbjen e jetës së vëllait të tij të madh, Smajl Komi(Ili), i cili ndër të tjera thekson se Danin, ai e kishte si busull orientuese në jetën e tij, jo vetëm për sportin, por për gjithçka.
Veriu Sport, i përcjellë ngushëllimet e sinqerta familjes Komi për humbjen e njeriut të tyre të afërt, si dhe komunitetit të sportit, për humbjen e një figure të njohur të futbollit shkodran.
(Video) Pamje nga ceremonia e përcjelljes për në banesën e fundit të ish futbollistit Ramadan Komi, si dhe prononcimet e dy ish futbollistëve Ahmet Meta dhe Rauf Çanga, si dhe të vëllait të tij Il Komi. Materiale këto që mund t’i ndiqni të plota në kanalin tonë zyrtar, Veriu Sport-YOUTUBE.
Gaspër MARKU