Arlind Hysaj dhe Arbër Hysaj, dy vëllezërit notarë të Future Sports Academy Shkodër, e cila drejtohet nga babai i tyre, Gilbert Hysaj, ishin përfaqësues të Shqipërisë në aktivitetin ndërkombëtar “Kupa e Republikës së Kosovës” në not, zhvilluar në Progoc (Prishtinë).
Duke garuar përkrah notarëve të ekipeve më të mira të Kosovës si dhe Rajonit, notarët shkodranë, Arlind dhe Arbër Hysaj shkëlqyen në garat e tyre duke arritur të fitojnë plotë pesë medalje. Ndër to, ishin tre medalje ari, një argjendi dhe një bronzi.
Konkretisht, rezultatin më të mirë e mori notary Arbër Hysaj, i cili fitoi dy medalje ari, një në garën 100 metra katërnotim (kategoria absolute), si dhe tjetra në 100 metra katërnotim (grupmosha 14 vjeçare). Krahas dy vendeve të para dhe medaljeve të arit, Arbër Hysaj u rendit i treti duke u nderuar me medaljen e bronztë në garën 100 metra stil i lirë.
Në podiumin e fituesit u ngjit edhe i vëllai i Arbrit, Arlind Hysaj, i cili fitoi vendin e parë dhe medaljen e artë ë 50 metra not stil delfin, ndërsa në konkurimin e garës 50 metra stil i lire, u rendit i dyti duke merituar medaljen e argjendë.
Suksesin në fjalë të dy vëllezërve kampion të notit, e ka përshëndetur edhe institucioni i Bashkisë Shkodër, kur ndër të tjera, në postimin e publikuar në faqen zyrtare, shkruan:
“Në kompeticionin “Kupa e Republikës së Kosovës” në not, i zhvilluar në Progoc (Prishtinë), dy notarët e Future Sports Academy Shkodër, Arlind Hysaj dhe Arbër Hysaj, përfaqësuan me krenari Shqipërinë. Notarët Arlind dhe Arbër Hysaj shkëlqyen në këtë garë, duke sjellë në Shkodër 5 medalje, ndër to, 3 ari, një argjendi dhe një bronzi. Urime notarëve tanë për këtë sukses të jashtëzakonshëm!
(Video) Pamje nga garat e kompeticionit “Kupa e Kosovës në not”, ku dy vëllezërit notarë shkodranë, Arlind dhe Arbër Hysaj, fituan 5 medalje(3 ari, 1 argjendi dhe 1 bronxi)
