Vllaznia-Kamza Basket, 81-77(22-22, 23-19, 19-19, 17-17)
Kuqeblutë e koshit për meshkuj kanë regjistruar fitoren e parë në kampionat. Kjo ka ndodhur mbrëmjen e së shtunës në pallatin e sportit “Qazim Dervishi” të Shkodrës, kur pas një dueli shumë luftarak dhe plot rivalitet, Vllaznia ka arritur të mposhtë Kamza Basket me rezultatin 81-77.
Sesa rivalitet kishte kjo sfidë, mjafton të përmendim barazimet në tre perioda që në një farë mënyrë nuk kishte ndodhur prej vitesh një gjë e tillë. Barazimi i parë është në periodën e parë 22-22, i dyti është në përiodën e tretë 19-19 dhe i treti në atë të fundit, të katërtën, 17-17.
Ajo që i dha suksesin Vllaznisë ishte perioda e dytë, gjatë së cilës skuadra e drejtuar nga trajneri Damian Bekteshi dhe kolegu i tij Roni Gjeçaj ishte më dominuese në fushën e lojës duke e mbyllur me fitore në shifrat 23-19. Dhe, kjo diferencë prej plus katër pikësh e shoqëroi skuadrën kuqeblu me fitore në fund të ndeshjes me rezultatin 81-77.
Në prononcimin e dhënë pas ndeshjes, trajneri kuqeblu Damian Bekteshi, vlerësoi shumë arritjen e kësaj fitoreje, e cila e ardhur pas tre humbjeve radhazi në kampionat ndaj Teutës, Tiranës dhe Besëlidhjes, pritet t’i japë optimizmin e duhur psikologjik skuadrës për të ecur më tej në rrugën e fitoreve të tjera në vazhdim.
(Video) Ndeshja, Vllaznia-Kamza Basket, pjesa e dytë e plotë, si dhe prononcimi i trajnerit Damian Bekteshi pas ndeshjes.
