Për Vllazninë e futbollit femra, shansi për të vazhduar të luajë në Europë është ende i hapur. Natyrshëm që objektivi kyesor, falë edhe investimeve të shumta të presidentit Lazër Matija me blerjen e 11-të futbollisteve të huaja ishte mbërritja në fazën e grupeve të Champions League, por ajo humbje e pësuar në ndeshjen e parë nga bjelloruseve të Dinamo Minsk, ia mohoi rrugëtimin në këtë kompeticion.
Megjithatë, nëse arrin të dalë fituese në përballjen me kampionen e Luksemburgut Racing Union, takim ky i vlefshëm për grupi 4 eleminator Champions League, që luhet paraditen e sotme në stadiumin “Loro Boriçi” prej orës 10:00, Vllaznia fiton të drejtën të luajë në një tjetër kompeticion europian, atë të “Europa Cup”.
Një objektiv ky që pritet të jetë i realizueshëm, edhe për faktin se në fushë për Vllazninë sot do të jetë edhe kapitenia Megi Doçi, e cila edhe pse ishte përgatitur dhe karikuar për të dhënë më të mirën në ndeshjen e parë ndaj bjelloruseve, madje edhe duke premtuar gol, krejt papritur, UEFA njoftoi se një karton i kuq i marrë prej saj sezonin e kaluar europian, e penalizonte atë të luante në sfidën e parë të grupit.
Për të arritur fitoren dhe vazhdimin e konkurimit në Europë, Vllaznisë i duhet edhe mbështetja e tifozëve në ndeshjen e paradites së sotme, gjë që në fakt nuk i ka munguar edhe në ndeshjet e tjera.
(Video) Pamje nga ndeshja e parë e grupit 4 eleminator të Champions Leagues, Vllaznia-Dinamo Minsk(Bjellorusi)
