Beslidhja-Vllaznia 95-79(10-19, 29-25, 34-17, 22-18)
Me tre fitore radhazi, Besëlidhja e basketit meshkuj mbyll duelin gjysmëfinal me Vllazninë duke prerë bileten e finalistes së parë të Kampionatit Kombëtar të Superligës së basketbollit meshkuj, dhe tashmë është në pritje të finalestes tjetër që do të dalë nga çifti Apolonia-Teuta, ku pas tre duelesh, kryesohet nga fierakët 2-1.
Referuar duelit gjysmëfinal Besëlidhja-Vllaznia, ai nisi me fitoren e parë të lezhjanëve me rezultatin 78-65, takim ky i luajtur në pallatin e sportit “Asllan Rusi” për të vijuar me takimin e dytë luajtur në pallatin e sportit “Qazim Dervishi” të Shkodrës. Sfidë kjo tejet elektrizuese dhe me një publik shumë entuziast, ku krahas fansave kuqeblu të pranishëm ishin edhe një pjesë e konsiderueshme e tifozërisë lezhjane, u mbyll me fitoren e Besëlidhjes 74-92.
Ndonëse përballë një skuadër potente, padyshim më të mirën e basketbollit shqiptar të viteve të fundit, Vllaznia tentoi që me një fitore në ndeshjen e tretë te rihapte garën. Dhe, në fakt, sfida e tretë e luajtur mbrëmjen e së premtes në pallatin e sportit “Asllan Rusi”, nisi në mënyrën më të mirë të mundshme për skuadrën kuqeblu.
Skuadra e drejtuar nga trajneri Eni Llazani prezanton një period të parë tërësisht dominuese ndaj Besëlidhjes, teksa e mund me shifrat 10 me 19. Me një lojë të mirë vijon edhe perioda e dytë për Vllazninë, por fundi i kësaj periode flet lezhjanët, të cilët arrijnë ta fitojnë atë me shifrat 29-25, por pa mundur të frenojnë fitoren e pjesës së parë nga Vllaznia me shifrat 39-44.
Por, ato që vendosin fatin e kësaj ndeshje janë 20-të minutat e pjesës së dytë, dhe sidmos perioda e tretë e cila fitohet me një rezultat të thellë nga lezhjanët me shifrat 34-17 duke përmbysur shifrat në favorin e tyre, 73-61.
Epërsia e Besëlidhjes vijon të jetë prezente edhe në periodën e katërt, ku djemtë e drejtuar nga trajneri Afrim Bilali e fitojnë me shifrat 22-18 duke bërë që e gjitha ndeshja të mbyllet me fitoren e lezhjanëve me rezultatin, 95-79.
Në këtë mënyrë, me tre fitore radhazi, Besëlidhja vijon rrugën për në finalen e Kampionatit Kombëtar të Superligës së meshkujve duke pritur rivalin tjetër që do të dalë nga çifti Apolonia-Teuta, që pas tre duelesh kryesohet nga fierakët 2-1.
Ndërkohë, kuqeblutë e Vllaznisë e mbyllin këtu rrugëtimin e tyre, të sezonit 2024-2025, që ndonëse nuk arritën të fitojnë trofe, mbërritja në finalen e Kupës së Shqipërisë si dhe në katër më të mirat e gjysmëfinales së kampionatit, është një tregues pozitiv, që gjithësesi, me pak kujdes, bilanci mund dhe duhej të ishte më pozitiv.