Vllaznia Futsal-Tigers Roermond(Holande) 2-6
Për Vllazninë e Futsales, ndeshja e fundit e grupit B të fazës paraeleminatore UEFA Futsal Champions League, ishte e një rëndësie të veçantë. Kjo, pasi kuqeblutë e drejtuar nga Arben Xhaferi vinin në këtë përballje ndaj kampiones së Holandes, Tigers Roermond, me një fitore 4-0 ndaj kampiones së Islandes, Isbjorninn, si dhe humbjes 2-4 me kampionen e Malit të Zi, Bajo Pivljanin, ndërkohë që kundërshtari në dy sfidat e para ka regjistruar dy fitore, 12-2 ndaj Isbjorninn dhe 5-0 ndaj Bajo Pivljanin.
Një fitore e mundshme e kuqebluve në këtë përballje do ta rendiste Vllazninë në vendin e parë të grupit B, duke siguruar automatikisht kualifikimin në turin tjetër të UEFA Futsal Champions League.
Por, duke pasur përballë një skuadër shumë të përgatitur dhe me lojtarë me përvojë të madhe në anerën ndërkombëtare, Vllaznia debutuese si konkuruese për herë të parë në një kompeticion të tillë, nuk arriti të përballojë kampionët e Holandës.
E gjithë ndeshja, mbyllet me rezultatin 6 me 2 në favor të ekipit holandez, Tigers Roermond, i cili me tre fitore radhazi, renditet në vendin e parë të grupit B duke u kualifikuar në turin tjetër të UEFA Futsal Champions League.
Gjithësesi, edhe pse nuk arriti të renditej në vendin e parë, Vllaznia e Futsales, pa përvojën e duhur europiane, ka bërë një përfaqësim dinjitoz përballë rivalëve, të cilët luajnë prej vitesh në këtë kompeticion. Dhe, përpos kësaj, KF Vllaznia Futsal i drejtuar nga presidenti Fisnik Barbullushi, si klubi organizator i ndeshjeve të grupit B fazës paraeleminatore UEFA Futsal Champions League, ka marrë vlerësime maksimale për korrektësinë dhe mbarëvajtjen model të ndeshjeve 3-4 ditore.
Gaspër MARKU
