Vllaznia-Peja, e vlefshme për Ligën Unike në basketboll për meshkuj, ishte ndeshja e fundit që trajneri Nikola Milatoviç drejtoi skuadrën kuqeblu. Humbja e kësaj sfide, por edhe disa të tjerave të mëparshme, duket se kanë ndikuar në vendimin e marrë nga drejtuesit e Klubit të Basketbollit Vllaznia për shkarkimin e trajnerit malazez.
Ardhja e Milatoviç në krye të Vllaznisë vinte pas një seri suksesesh në kampionatin shqiptar, së fundmi kampion me ekipin e Teutës, pritej të forconte Vllazninë dhe të dobësonte rivalin. Të paktën kështu besonte presidenti Alban Xhaferi kur firmosi me teknikun malazez. Por, çuditërisht, gjërat nuk shkuan aspak mirë në drejtimin e Vllaznisë, jo vetëm në rezultatet, por edhe në raportet brenda skuadrës. Një gjë e tillë çoi në shkëputjen e marrëdhënieve dypalëshe gjatë ditës së martë, ndërkohë që seanca stervitore e kësaj dite është drejtuar nga zv.trajneri kuqeblu Ervin Berdica.
Largimi i trajnerit Milatoviç vjen në një kohë kur skuadra kuqeblu ka një bilanc negativ në pjesëmarrjen e Ligës Unike, Shqipëri-Kosovë duke qënë në vendin fundit të renditjes, me një fitore dhe 5 humbje, ndërkohë që edhe në kampionatin e Superligës shqiptare renditja e saj është në vendin e katërt.
Deri në mbyllje të vitit 2021, Vllaznia ka në kalendar edhe tre ndeshje, një për Ligën Unike dhe dy për Superligën e basketbollit shqiptar. Nesër, skuadra kuqeblu nën drejtimin e trajnerit të komandur Ervin Berdica luan në transfertë përballë Kamza Basket, ndërkohë që më pas ndeshet me Teutën për Ligën Unike për ta mbyllur me Dinamon për Superligën shqiptare.
