Ora 16.45 e ditës së sotme, e premte 21 janar 2022, shënon startin e javës së 17-të të Kategorisë Superiore të futbollit shqiptar me duelin Vllaznia-Egnatia.
Në pritje të kësaj ndeshje, kuqeblutë kanë zhvilluar pasditen e djeshme seancën fundit anti-Egnatia. Konsumimi i kësaj seance në tapetin e gjelbërt të stadiumit “Loro Boriçi” i ka dhënë mundësi teknikut Brdariç të jetë më komod në zbatimin e skemave që skuadra pritet të aplikojë ballafaqimin e sotëm.
Krahas të tjerave, kjo seancë është shfrytëzuar edhe për fiksimin e formacionit të parë, ku në mungesë të Latifit për skualifikim me kartonë, por edhe të Hakajt akoma i rikuperiar në masën e duhur, në fushë janë projektuar zëvendësuesit e tyre.
Kështu, nisur edhe nga ajo që Brdariç aplikoi në seancën e fundit stervitore, Vllaznia pritet ta nisë lojën me këtë formacion: Zogoviç në portë, Gurishta, Diagne, Adili, Bulatoviç, në mesfushë, Krymi, Jonuzi, Kruja, Da Silva dhe në sulm, Gjorgjeviç me Aralicen.