Miqësorja, Vllaznia-Drenica, e luajtur mesditen e sotme në fushën e Kompleksit Sportiv të ekipeve kombëtare në Kamzë ka përfunduar me rezultatin 2 me 1 në favor të skuadrës kuqeblu. Për dy skuadrat në fjalë që i përkasin kategorisë Superiore në Shqipëri dhe Kosovë, ballafaqimi i sotëm ka pasur si qëllim testimin, por edhe kolaudimin e formacionit të dy skuadrave kundërshtare në këtë periudhë ndërprerje të kampionateve përkatëse për ayrsye të angazhimit të ekipeve kombëtare në Ligën e Kombeve. Që të tre golat janë shënuar në pjesen e parë, ku vlen të theksohet se të parët kanë kaluar në avantazh futbollistët e Drenices kur Morina ka shënuar që në minutën e 18-të. Në vijim janë dashur edhe po kaq minuta lojë(36’) që Vllaznia të gjente golin e barazimit me anë të Gurishtës duke shfrytëzuar një rast rrëmuje në zonën kosovare. Dy minuta më vonë, në të 38-ten minutë, vjen edhe goli i dytë për Vllazninë me autor Imerin duke e mbuyllur kështu pjesën e parë me rezultatin 2 me 1 në favor të Vllaznisë. Edhe pse ka pasur përpjekje dhe raste për gol në të dy portat respektive, 45 minutat e pjesë së dytë nuk kanë prodhuar asnjë gol duke fiksuar kështu rezultatin përfundimtar, 2 me 1 për Vllazninë.
Formacioni i parë kuqeblu i drejtuar nga trajneri Thomas Brdariç në këtë ndeshje ishte ky: Qarri, Lekaj, Gurishta, Imami, Kruja, Marku, Ramadani, Isaevski, Hoxha, Imeri Dunga. Në pjesen e dytë Brdariç ka lënë sërishmi në portën të riun Qarri, Lekajn në mbrojtje dhe Ramadanin në mesfushë, ndërkohë që pjesa tjetër e formacionit ka ardhur nga stoli me Nertil Hoxhën, Isufin, Shehin, Lekaj, Jonuzi, Ramadani, Uheid Hoxha, Çoba, Deda dhe Sidorenco.