Vllaznia është mundur me rezultatin 3 me 1 në ndeshjen e parë të turit të parë të Conferencë League përballë Linfield FC(Belfast-Irlandë e Veriut). Një rezultat që avantazhon skuadrën kundërshtare për të kaluar në turin e dytë, por në Shkodër mendojnë ndryshe.
Futbollistët dhe stafi teknik janë optimistë që me një sforco, por edhe me pak fat, mund ta përmbysin rezultatin në ndeshjen e kthimit që do të luhet këtë të enjte në stadiumin “Loro Boriçi”.
Krahas karikimit të skuadrës në tërësi, gjë që po pasqyrohet në seancat stërvitore plot ritëm të kësaj pragndeshje, dëshira dhe besimi se Vllaznia do ta përmbysë rezultatin humbës të takimit të parë, ka të bëjë edhe tek mbështetja e tifozëve shkodranë, prania e të cilëve pritet të jetë shumë e madhe mbrëmjen e së enjtes në shkallët e stadiumit “Loro Boriçi”.
Se çfar peshe ka tifozëria në kësisoj rastesh, mjafton të përmendim përballjen e dytë të Conferencë League të sezonit të kaluar me skuadrën boshnjake Shiroki Brijeg, ku pikërisht me këtë rezultat humbës të ndeshjes së parë të luajtur në Bosnje, falë kësaj mbështetje të tifozëve, Vllaznia e përmbysi në ndeshjen e dytë të luajtur në “Loro Boriçi”.
Në këtë këndvështrim, klubi kuqeblu, përmes një njoftimi të publikur në rrjetet sociale i bën thirrje zyrtarisht tifozëve për t’i mbështetur në ndeshjen e së enjtes.
“Një ndeshje ku nuk mund të mungoni!
Merr biletën tënde!
Eja edhe Ti!
Vllaznia- Linfield
Të enjten ora 20.45 në stadiumin “Loro Boriçi”
Klubi i Futbollit Vllaznia njofton gjithashtu që të gjitha abonetë e sezonit të kaluar, janë të vlefshme edhe për këtë ndeshje.
Forca Vllaznia!”
