Grumbullimi dhe dy ndeshjet e para të kombëtares së Shqipërisë ndaj Anglisë dhe Andorrës për kualifikueset e Kupës së Botës, kanë bërë që këtë fundjavë kategoria Abissnet Superiore të jetë pushim.
Kjo ka qënë arsyeja që edhe futbollistët kuqeblu janë lënë pushim që pas ndeshjes së shtunës së kaluar me Skënderbeun deri këtë të mërkurë, kur i janë rikthyer proçesit stërvitor. \
Për katër pjesëtar kuqeblu nuk ka pasur pushim, pasi portjeri Aron Jukaj dhe sulmuesi Kevin Dodaj kanë qënë pjesë e ekipit kombëtar U21, ndërkohë që e veçantë ka qënë thirrja nga kombëtarja e madhe e drejtuar nga Silvinjo për dyshen tjetër Gledian Pusi dhe Antonio Delaj, të cilët janë bërë e stërvitjes së kuqezinjëve për deshjet ndaj Anglisë dhe Andorrës.
Pjesa tjetër e skuadrës kuqeblu ka qënë në dispozicion të trajnerit Tomas Brdariç, të cilët kanë nisur programin stërvitor për ndeshjen e radhës, e cila do të jetë përballë skuadrës kryesuese, Egnatia.
Sipas sektorit të Garave prane Federates Shqiptare te Futbollit, ndeshja, Egnatia-Vllaznia, e vlefshme për javën e 31-të të kategorisë Abissnet Superiore do të luhet mbrëmjen e së enjtes së ardhshme në stadiumin “Arena Egnatia” të Rrogozhinës duke filluar nga ora 20:00. Çifti në fjalë konsiderohet dhe në fakt i tillë është, si dueli më fortë i kësaj jave, pasi përballë janë dy skuadra të katërshes së parë duke qënë edhe si një test serioz për ndeshjet e “Final 4”.
Ndeshjet e javës së 31-të të Superiores, të cilat janë planifikuar të luhen në dy ditë, nisin të mërkurën e ardhshme të 26 marsit me të vetmin duel të kësaj dite, atë Tirana-Bylis që nis në orën 19:00, duke ballafaquar dy skuadra që luftojnë për mbijetese. Ndërkohë, takimet e tjera të kësaj jave, janë: Laçi- Elbasani, ora 14:00, Dinamo City- Partizani ora 17:00, Teuta- Skenderbeu ora 17:00, për t’u mbyllur me kryendeshjen jëvës, Egnatia- Vllaznia ora 20:00.